هونه‌رنما

به‌ گوێره‌ی هه‌واڵی "فرانس پرێس"، (11)هه‌مین خولی كێبرِكێیه‌كانی ئۆسكاری سینه‌مای هیندستان بۆ ماوه‌ی سێ رۆژ له‌ (5-7)ی حوزه‌یران له‌ سریلانكا به‌رِێوه‌ ده‌چێت.

ئه‌و رێورِه‌سمه‌ به‌ ئاماده‌بوونی زیاتر له‌ (500) میوانی شانازی له‌و وڵاته‌ به‌رِێوه‌ ده‌چێت و به‌ شێوه‌ی راسته‌وخۆ له‌ رێگای ته‌له‌فزیون بۆ نزیكه‌ی (600) ملیۆن بینه‌ر له‌ (110) وڵاتی جیهان بڵاو ده‌كرێته‌وه‌.

له‌ به‌شداربووانی ئه‌و رێورِه‌سمه‌ ده‌توانین ئاماژه‌ به‌ "ئه‌میتاب باچان"، "ئابشیك باچان"، "ئایشواریارای"، "عامیر خان"، "ئانیل كاپور"، "كاجول"، "جوهی چاولا"، "دێرمێندرا"، "مۆهانلال"، "شارۆخ خان" و...هتد بده‌ین.

ئه‌و فیلمه‌ چیرۆكی دانیشتوانی شاری كه‌ركوك و سكاڵایان له‌ بوونی نه‌وت له‌ شاره‌كه‌یاندا ده‌خاته‌روو، چیرۆكی ژیانی و كێشه‌و گیروگرفتی خه‌ڵكی كه‌ركوكه‌.

لیژنه‌ی دادوه‌رانی به‌شی نێوه‌نه‌ته‌وه‌یی ئه‌و فیستیڤاڵه‌ له‌ 4 نیسان،  له‌ یاداشتێكدا له‌ ماڵپه‌ری فیستیڤاڵه‌وه‌ رایانگه‌یاندوه‌، ئه‌وان دوای سێ رۆژ كاری قورس و بینیی فیلمه‌كان، بڕیاریانداوه‌ ئه‌و فیلمه‌ خه‌ڵات بكه‌ن،

خه‌ڵاته‌كانی به‌شی نێونه‌ته‌وه‌یی كه‌ ته‌نها دوو خه‌ڵات دبه‌به‌خشێت، به‌م شێوه‌یه‌ بوون، خه‌ڵاتی یه‌كه‌م بۆ فیلمی "دوای هه‌موویان" له‌ ده‌رهێنانی رافائێل سار له‌ وڵاتی به‌رازیل، خه‌ڵاتی دووه‌م بۆ فیلمی "نه‌وت شێرپه‌نجه‌ی شاره‌كه‌م" له‌ ده‌رهێنانی ته‌ها كه‌ریمی.

"نه‌وت شێرپه‌نجه‌ی شاره‌كه‌م" پێشتریش به‌شداری له‌ چه‌ندین فیستیڤاڵی نێونه‌ته‌وه‌یی وه‌ك فێستیڤاڵی فیلمی دیكومێنتی "ئه‌لجه‌زیره‌" كردووه‌ و خه‌ڵاتی ته‌له‌فیزیۆنیERDELY  له‌ به‌شی دۆكیۆمێنتی ده‌یه‌مین فێستیڤاڵی  فیلمی له‌ شاری (مورش) له‌ وڵاتی رۆمانیا به‌ده‌ست هێناوه‌.
ئه‌م فیلمه‌، فیلمێكی 20  خوله‌كییه‌، له‌ كه‌ركوك و ده‌وروبه‌ری وێنه‌ی گیراوه‌، باس له‌ كێشه‌كانی بوونی نه‌وت له‌و شاره‌ ده‌كات.

نوسین و ده‌رهێنانی ئه‌و فیلمه‌ له‌ لایه‌ن ته‌ها كریمی ئه‌نجامدراوه‌ و كه‌یوان یوسفی كاری وێنه‌گرتن و هاوڕێ كه‌ریمی كار مۆنتاژی بۆ كردووه‌. 

ته‌ها كه‌ریمی ده‌رهێنه‌ری ئه‌و فیلمه‌ له‌دایك بووی ساڵی 1976ه‌ له‌شاری بانه‌ له‌رۆژهه‌ڵاتی كوردستان، سه‌ره‌تای كاری به‌ نووسینی چیرۆك ده‌ست پێده‌كات، ساڵی 2004 له‌زانكۆی هونه‌ری تاران له‌به‌شی سینه‌ما به‌كالیۆرس وه‌رده‌گرێت، تا ئێستا 4 فیلمی (سنوری ژین)، (زریان)، (سه‌مای مرواریه‌كان) و (كوێستانی سپی) ساز كردووه‌، یه‌كه‌م فیلمی سینه‌مایی دررێژی به‌ ناوی "كوێستانی قه‌ندیل" ته‌واوو بووه‌ وئاماده‌ی نمایش كردنه‌.

ناوی فیلم: نه‌‌وت شێرپه‌‌نجه‌‌ی شاره‌كه‌م
نووسین و ده‌رهێنان: ته‌‌ها كه‌‌ریمی.
وێنه‌گر: كه‌‌یوان یوسفی.
ده‌نگ هه‌ڵگر: عه‌‌لی وه‌‌فایی.
مۆنتاژ: هاوڕێ كه‌‌ریمی.
كات‌: 20 خوله‌‌ك

شاخه‌وان ئیدریس به‌رِێوه‌به‌ری به‌رِێوه‌به‌رایه‌تی سینه‌مای هه‌ولێر له‌ لێدوانێكی  بؤ‌ ئاژانسی په‌یامنێر وتی "به‌رِێوه‌به‌رایه‌تی سینه‌مای هه‌ولێر به‌هاوكاری له‌گه‌ڵ به‌رِێوه‌به‌رایه‌تی گشتیی سینه‌مای وه‌زاره‌تی رۆشنبیری حكومه‌تی هه‌رێمی كوردستان، له‌ خۆ ئاماده‌كردن داین بۆ سازكردنی فیستیڤاڵی فیلمی كوردی له‌ شاری زیورخ له‌ وڵاتی سویسرا".

به‌رِێوه‌به‌ری به‌رِێوه‌به‌رایه‌تی سینه‌مای هه‌ولێر، ده‌رباره‌ی فیلمه‌ به‌شداربووه‌كانی فیستیڤاڵ وتی "ئه‌و فیلمانه‌ی به‌رهه‌می وه‌زاره‌تی رۆشنبیرین، هه‌روه‌ها ئه‌و فیلمه‌ بڵندانه‌ی كه‌ له‌ ده‌ره‌وه‌ له‌ باره‌ی كورده‌وه‌ به‌رهه‌م هاتوون یان له‌ لایه‌ن ده‌رهێنه‌ر كورده‌كانه‌وه‌ به‌رهه‌م هاتوون، ئه‌مه‌ جگه‌ له‌ چه‌ندین فیلمی دیكۆمێنتی و كورته‌ فیلم، له‌م فیستیڤاڵه‌دا به‌شدار ده‌بن".

شاخه‌وان ئیدریس ئه‌وه‌شی ئاشكرا كرد كه‌ هه‌ر له‌ میانه‌ی ئه‌م فیستیڤاڵه‌دا، خه‌ڵات به‌سه‌ر فیلمه‌ سه‌ركه‌وتووه‌كاندا دابه‌ش ده‌كرێت.

ناوبراو ئه‌وه‌شی راگه‌یاند كه‌ ئه‌م فیستیڤاڵه‌ به‌ هه‌ماهه‌نگی له‌گه‌ڵ وه‌زاره‌تی رۆشنبیری سویسرا سازده‌كرێت.

شه‌شه‌مین خولی فیستیڤاڵی فیلمی كوردی له‌نده‌ن بۆ به‌شداری كردن له‌ یه‌كه‌مین پێشبڕكێی دیزاینی پۆسته‌ر و كاتالۆگی فیستیڤاڵدا، له‌ هونه‌رمه‌ندانی گرافیست، شێوه‌كار و نیگاركێش بانگهێشتی كردووه‌ بۆ ئه‌وه‌ی له‌ یه‌كه‌مین خولی پێشبڕكێی دیزاینی پۆسته‌ردا به‌شداری بكه‌ن.

له‌م پێشبڕكێیه‌دا به‌شداری كردن بۆ هه‌مووانه‌ و براوه‌ی پێشبڕكییه‌كه‌ش، له‌ سه‌ر ئه‌رك و خه‌رجی به‌ڕێوه‌به‌رانی فیستیڤاڵ، بۆ ئاماده‌بوون له‌ شه‌شه‌مین خولی فیستیڤاڵی فیلمی كوردی له‌نده‌ن بانگهێشت ده‌كرێت.

فیستیڤاڵی فیلمی كوردی له‌نده‌ن یه‌كێكه‌ له‌ گه‌وره‌ترین فیستیڤاڵه‌كانی فیلمی كوردی له‌ سه‌رتاسه‌ری دنیا كه‌ هه‌موو ساڵێك به‌ به‌شداری فیلمه‌ كوردییه‌كان كه‌ به‌رهه‌می سینه‌ماكارانی كورد و بیانین، له‌ 4 به‌شی فیلمی بڵندی سینه‌مایی، فیلمی دیكۆمێنتی، كورته‌ فیلم و فیلمی ئه‌نیمه‌یشێن، له‌ جۆری دیكۆمێنتی و درامی به‌ ناوه‌رۆكی كوردستان و كورده‌كان، له‌ شاری له‌نده‌ن له‌ وڵاتی به‌ریتانیا به‌ڕێوه‌ده‌چێت.

به‌رپرسانی شه‌شه‌مین خولی فیستیڤاڵی فیلمی كوردی له‌نده‌ن داوا له‌ هه‌موو هونه‌رمه‌ندانی گرافیست، شێوه‌كار، نیگاركێش و هه‌روه‌ها هۆگرانی ئه‌م هونه‌ره‌ له‌ سه‌رتاسه‌ری دنیا ده‌كه‌ن بۆ به‌شداری كردن له‌ یه‌كه‌مین خولی پێشبڕكێی وێنه‌ونیگار به‌ نیازی به‌كارهێنان له‌ دیزاینی پۆسته‌ر و نامیلكه‌ی پرۆگرامدا، ئه‌و به‌رهه‌مانه‌ی وا په‌یوه‌ندیان هه‌یه‌ به‌ كولتووری كورد، سیمبۆله‌كانی نێو فه‌رهه‌نگی كوردی، سینه‌ما، یادی شه‌شه‌مین خولی فیستیڤاڵی فیلمی كوردی و هه‌روه‌ها شاری له‌نده‌ن وه‌كوو پایته‌خت و شوێنی فیستیڤاڵه‌كه‌، به‌ زووترین كات بۆ نووسینگه‌ی فیستیڤاڵ له‌ شاری له‌نده‌ن ره‌وانه‌ بكه‌ن. دوایین مۆڵه‌ت بۆ ناردنی به‌رهه‌مه‌كان رۆژی 31ی ئۆگۆستی 2009 دیاری كراوه‌.

جێی ئاماژه‌ پێدانه‌ ئه‌مه‌ یه‌كه‌مین جاره‌ كه‌ فیستیڤاڵی فیلمی كوردی له‌نده‌ن
پێشبڕكێی وێنه‌ونیگار بۆ دیزاینی پۆسته‌ر به‌ڕێوه‌ده‌بات، ئه‌م فیستیڤاڵه‌ پێشتر به‌ شێوه‌ی تایبه‌ت داوای له‌ نیگاركێشان و شێوه‌كاران ده‌كرد تاكوو ئه‌ركی دروستكردنی وێنه‌ و نیگاره‌كانی فیستیڤاڵ له‌ ئه‌ستۆ بگرن.

هونه‌رمه‌ندان و هۆگران بۆ به‌شداری كردن له‌ یه‌كه‌مین پێشبڕكێی وێنه‌ونیگاری فیستیڤاڵی فیلمی كوردی له‌نده‌ن و هه‌روه‌ها بۆ وه‌رگرتنی زانیاری زیاتر به‌ زمانه‌كانی كوردی، ئینگلیزی، فارسی و عه‌ڕه‌بی و پڕكردنه‌وه‌ی فۆرمی ناردنی به‌رهه‌مه‌كانیان، ده‌توانن سه‌ردانی ماڵپه‌ڕی تایبه‌تی فیستیڤاڵه‌كه‌ به‌ ناونیشانی www.lkff.co.uk بكه‌ن.

"ژیانمان به‌ هه‌موو تامه‌كانییه‌وه‌ خۆش بوێت" پۆسته‌رێكی دیزاینه‌ر فه‌هیمه‌ كه‌ریمییه‌ و یه‌كێكه‌ له‌ پۆسته‌ر هه‌ڵبژێردراوه‌كان بۆ ئه‌و پێشانگا نێونه‌ته‌وه‌ییه‌ كه‌ برِیاره‌ له‌ وڵاتی پیرِۆ به‌رێوه‌ بچێت و دواتر ئه‌و به‌رهه‌مان له‌ چه‌ندین وڵاتی دیكه‌ نمایش ده‌كرێن كه‌ سه‌رجه‌میان 77 پۆسته‌رن ده‌رباره‌ی نه‌خۆشی شێرپه‌نجه‌. 

كۆلێژی هونه‌ر و دیزانی زانكۆی لایۆلای بانگهێشتی هه‌موو دیزاینه‌رانی جیهان كرد بۆ به‌شداری كردن له‌ پێشانگایه‌كی نێونه‌ته‌وه‌یی به‌ ناوی "شێرپه‌نجه‌ ئومێد و ژیان".

پێشانگاكه‌ دوو ئامانجی هه‌یه‌ یه‌كه‌میان رێگه‌گرتن له‌ نه‌خۆشی شێرپه‌نجه‌ و دووه‌م گه‌رِاندنه‌وه‌ی هیوا و ئومێد بۆ ئه‌و كه‌سانه‌ی كه‌ له‌گه‌ڵ ئه‌و نه‌خۆشییه‌ مه‌ترسیداره‌دا ژیان به‌سه‌ر ده‌به‌ن.

ئه‌و كێبركێیه‌ خه‌ڵاتی نییه‌، به‌ڵكوو له‌ كۆی به‌رهه‌م نێردراوه‌كان كه‌ زۆربه‌یان له‌ وڵاتانی ئێران و چیلی، مه‌كسیك، لوبنان، كۆلۆمبیا و ئه‌فریقا و پیرۆوه‌ بوو، 77 به‌رهه‌م بۆ نمایشكردن له‌ پێشانگایه‌كی نێونه‌ته‌وه‌یدا هه‌ڵبژێردراوون كه‌ به‌رهه‌می "ژیانمان به‌ هه‌موو تامه‌كانییه‌وه‌ خۆش بوێت" یه‌كێكه‌ له‌ پۆسته‌ره‌ هه‌ڵبژێردراوه‌كان.

فه‌هیمه‌ كه‌ریمی له‌ دایكبووی شاری بانه‌ی رۆژهه‌ڵاتی كوردستانه‌، به‌كالۆریۆسی له‌ دیزان هه‌یه‌ و تا ئێستا چه‌ندین خه‌ڵاتی ناوخۆیی ئێرانی وه‌رگرتووه‌ و به‌شداری له‌ چه‌ندین پێشانگای نێوده‌وڵه‌تی كردوه‌ و زیاتر له‌ 20 به‌رهه‌می پۆسته‌ری له‌ كتێبكانی ساڵانه‌ی گرافیكی ئێران و گرافیكی خوێندكارانی ئێران چاپكراوه‌. 

موزیكزانی به‌ئه‌زموون و ناوداری كورد هۆشه‌نگ كامكار و سه‌رپه‌ڕستی هونه‌ری گروپی موزیكی كامكاران له‌ لێدوانێكی تایبه‌ت به‌ ئاژانسی هه‌واڵی په‌یامنێر، سه‌باره‌ت به‌ كه‌سایه‌تی شمشاڵژه‌نی كورد "قاڵه‌مه‌ڕه‌"، گوتی: "به‌ڕای من یه‌كێك له‌ ئه‌ستێره‌كانی فه‌رهه‌نگی موزیكی كوردی بوو،] هۆشه‌نگ كامكار لێره‌دا دڵی پڕ بووه‌ و قسه‌ی بۆ نه‌ده‌هات ...  [به‌ڕاستی ناتوانم قسه‌ بكه‌م نازانم بڵێیم چی، به‌ڵام حه‌یف بوو. نه‌ له‌ زه‌مانی پێشوودا رێزیان لێگرت و نه‌ له‌م زه‌مانه‌شدا، به‌ڵام هونه‌رمه‌ندێكی گه‌وره‌ بوو."

هه‌روه‌ها گوتی: "باروودۆخی ژیانی ئێمه‌ زۆر باش نییه‌ و هه‌موو كه‌سێك ئێمه‌ ده‌ناسێت كه‌ چۆن ژیان ده‌به‌ینه‌ سه‌ر، به‌ڵام چه‌ند ساڵ له‌مه‌و به‌ر بڕیارماندا كه‌ یارمه‌تی "قاڵه‌مه‌ڕه‌" بده‌ین و شتێكمان بۆ دیاری كرد هه‌ر چه‌نده‌ زۆر نه‌بوو، به‌ڵام به‌داخه‌وه‌ هیچ كه‌سێك یارمه‌تی نه‌ده‌دا."

سه‌رپه‌ڕستی هونه‌ری گروپی موزیكی كامكاران سه‌باره‌ت به‌ شمشاڵژه‌نی كورد، گوتی: "مرۆڤێك بوو كه‌ له‌ پای فیكر و ئه‌ندێشه‌ی خۆی ده‌ژیا مرۆڤێكی عارف بوو، من ئه‌مڕۆكه‌ به‌ هاوسه‌ركه‌مم ده‌گوت كه‌ ئێمه‌ ئه‌گه‌ر بمانه‌وێت عیرفان و عارفییه‌ت ته‌فسیر بكه‌ین به‌ ته‌واوی مانا له‌ وجوودی ئه‌و پیاوه‌دا بوو. به‌و هونه‌رییه‌وه‌ ژیانی خۆی كرد به‌ له‌به‌ر چاوگرتنی ئه‌وه‌ی كه‌ له‌ مێژووی موزیكی كوردیدا هونه‌رمه‌ندێكی گه‌وره‌ بوو، هیچ كاتێك هونه‌ره‌كه‌ی نه‌فرۆشت و له‌و فیكر و بیروباوه‌ڕه‌ی كه‌ بووی هیچ كاتێك وازی نه‌هێنا و هه‌موو كاتێك به‌دوای ئامانج  و مه‌به‌ست و موزیكی خۆیه‌وه‌ بوو. من هه‌موو كات به‌ داخم بۆی كه‌ له‌ مێژووی ژیانیدا هیچ كه‌سێك ئاوڕی لێنه‌داوه‌ كه‌ ئه‌مه‌ زۆر جێگای داخه‌."

هۆشه‌نگ كامكار سه‌باره‌ت به‌ ره‌نگدانه‌وه‌ی كاره‌كانی "قاله‌ مه‌ڕه‌" له‌ ئاواز و گۆرانی كامكاراندا، گوتی: "من چه‌ند ساڵ له‌مه‌وبه‌ر له‌ كۆنفرانسی موزیكی "سواس" له‌ له‌نده‌ن بۆ پێشكه‌ش كردنی وتارێكی زانستی له‌سه‌ر ئامێری شمشاڵ بۆ وڵاتی به‌ریتانیا بانگهێشت كرابووم، هه‌ندێك له‌ كاره‌كانی "قاله‌ مه‌ڕه‌"م به‌ شێوی ڤیدیۆ تۆمار كرد. له‌م كۆنفرانسه‌دا من سه‌باره‌ت به‌ ئامێری شمشاڵ و شێوه‌ی ژه‌نینی ئه‌م ئامێره‌ و هه‌روه‌ها مه‌قامه‌كانی ئاخاوتنم كرد و چه‌ندین دیمه‌نم له‌ وێنه‌كانی ئه‌م فیلمه‌ بۆ بینه‌ران نمایش كرد. دیاره‌ كاره‌كانی قاله‌ مه‌ڕه‌ له‌سه‌ر ئاواز و گۆرانی گروپی موزیكی كامكاراندا كاریگه‌ری هه‌یه‌. نه‌ ته‌نیا كاره‌كانی قاله‌ مه‌ڕه‌ له‌سه‌ر ئێمه‌ كاریگه‌ری ئه‌وتۆی هه‌یه‌ به‌ڵكوو به‌ گشتی ئێمه‌ له‌ موزیكی كوردی كه‌ڵك وه‌رده‌گرین."

ئاوازدانه‌ر و ئه‌ندامی گروپی موزیكی كامكاران سه‌باره‌ت به‌ كاری هونه‌ری هاوبه‌ش له‌ گه‌ڵ قاله‌مه‌ڕه‌، گوتی: "زۆر به‌ داخم كه‌ نه‌مانتوانی و رێكنه‌كه‌وت كه‌ له‌گه‌ڵ گروپی موزیكی كامكاراندا به‌ شێوه‌ی كۆنسێرت به‌رنامه‌یه‌ك پێكه‌وه‌ پێشكه‌ش بكه‌ین كه‌ ئه‌وه‌ ته‌نیا به‌ هۆی دووری رێگاوه‌ بوو، ئه‌و له‌ ئێمه‌ دوور بوو و نه‌مانتوانی ئه‌و كاره‌ به‌یه‌كه‌وه‌ بكه‌ین. به‌ڵام من له‌ كوردستانی عێراق كاك عه‌بدوڵڵا جه‌ماڵ سگرمه‌ كارێكی سه‌باره‌ت به‌ قاله‌مه‌ڕه‌ نووسی و زۆر جوان و رێكووپێك بوو، به‌ بڕوای من ئه‌وه‌ له‌ مێژوودا ماوه‌ و من لێره‌وه‌ پیرۆزبایی پێی ده‌ڵێیم كه‌ ئه‌و كاره‌ جوانه‌ی كرد به‌ بڕوای من زۆر زۆر جوان بوو، من هه‌ر كاتێك ئه‌و كلیپه‌ ده‌بینم دڵم پڕده‌بێت."

هه‌روه‌ها گوتی: "له‌ده‌ستدانی "قاله‌مه‌ڕه‌" بۆ ته‌واوی گه‌لی كورد زۆر جێی داخه‌ له‌ هه‌ر شوێنێكی دنیا بێت، یه‌كێك له‌و ئامێرژه‌نه‌ گه‌ورانه‌ بوو كه‌ به‌داخه‌وه‌ زۆر به‌داخه‌وه‌ له‌ هه‌ژاری و نه‌داریدا ژیانی به‌سه‌ر ده‌برد، میلله‌تی كورد بۆ ئه‌و كه‌سایه‌تییه‌ ده‌بێت ره‌شپۆش بێت و ماته‌مین بگرێت."

ئاوازدانه‌ی كورد سه‌باره‌ت به‌ به‌راوردكردنی ئاستی هونه‌ری و ئامێرژه‌نی قاله‌مه‌ڕه‌ له‌ گه‌ڵ هونه‌رمه‌ندانی ناوداری دنیا، گوتی: "ده‌توانم "قاله‌مه‌ڕه‌" وه‌كوو سیتارژه‌نه‌ ناودار و گه‌وره‌ی هێندستان "بیسمیلا خان" به‌راورد بكه‌م، له‌ ئێراندا ئێمه‌ ئامێرژه‌نی زۆر گه‌وره‌مان هه‌یه‌ بۆ نموونه‌ "شاهمیرزا مورادی" ئامێرژه‌نی به‌توانای لوڕستان. قاله‌مه‌ڕه‌ش له‌ ئاستێكی زۆر به‌رزدا ئامێری شمشاڵی ده‌ژه‌نی، به‌ڵام به‌و شێوه‌یه‌ی كه‌ ده‌بوایه‌ نه‌ناسرا و هه‌ر له‌ شاری بۆكاندا ماوه‌ و به‌داخه‌وه‌ كه‌سێك ده‌ستی نه‌گرت كه‌ هونه‌ره‌كه‌یان به‌ شێوه‌ی ئه‌وتۆ و پێویست له‌ ئاستی ئێران و دنیادا بناسرێت."

موزیكزانی كورد هۆشه‌نگ كامكار و سه‌رپه‌ڕستی هونه‌ری گروپی موزیكی كامكاران له‌ كۆتایی ئه‌م دیداره‌دا گوتی: "ئێمه‌ وه‌كوو گروپی موزیكی كامكاران ئه‌و توانایه‌مان نییه‌ كه‌ به‌ ته‌نیا رێوڕه‌سمێك بۆ به‌رز راگرتنی یاد و بیره‌وه‌ری ئه‌و كه‌سایه‌تییه‌ به‌ڕێوه‌به‌رین، به‌ڵام له‌ به‌رنامه‌ماندا هه‌یه‌ كه‌ كارێكی گونجاو بۆ قاڵه‌‌مه‌ڕه‌ بكه‌ین، ده‌بێت ئه‌نجوومه‌نی كورده‌كانی تاران یا هه‌ر كه‌سێكی دیكه‌ كه‌ ئه‌و ئه‌ركه‌یان له‌سه‌ر شانه‌، رێوڕه‌سمێك بخه‌نه‌ڕێ كه‌ هه‌موو كوردێك بتوانن تیایدا به‌شداری بكه‌ن و پێكه‌وه‌ یادی مامه‌ قادر به‌رز رابگرین."

 فیلمه‌ نوێكه‌ی سینه‌ماكاری كورد به‌همه‌ن قوبادی به‌ ناوی "كسی از گربه‌های ایرانی خبر نداره‌ ..." واته‌ "كه‌سێك له‌ پشیله‌ ئێرانییه‌كان خه‌به‌ری نییه‌ ...!" Nobody knows about Persian cats… له‌ ده‌ستپێكی رێوڕسمی كردنه‌وه‌ی به‌شی فه‌رمی "جۆرێك روانین" كه‌ یه‌كێكه‌ له‌ به‌شه‌ فه‌رمییه‌كانی 62مین خولی فیستیڤاڵی نێونه‌ته‌وه‌یی فیلمی كان، له‌ هۆڵی دوبۆسی شاری كان له‌ وڵاتی فه‌ره‌نسا نمایش كرا و له‌ لایه‌ن بینه‌ران، رۆژنامه‌نووسان و رخنه‌گرانی هونه‌ری سینه‌ماوه‌ پێشوازییه‌كی باشی لێكرا.

فیلمی سینه‌مایی "كه‌سێك له‌ پشیله‌ ئێرانییه‌كان خه‌به‌ری نییه‌ ...!" دوای ئه‌وه‌ی كه‌ له‌ رێوڕه‌سمی كردنه‌وه‌ی به‌شی فه‌رمی "جۆرێك روانین" له‌ 62مین خولی فیستیڤاڵی نێونه‌ته‌وه‌یی فیلمی كان نمایش كرا، بۆ رۆژنامه‌نووسان و هه‌روه‌ها ده‌زگاكانی راگه‌یاندنی دنیا نمایش كرا و لایه‌ن بینه‌ران، رۆژنامه‌نووسان و رخنه‌گرانی هونه‌ری سینه‌ماوه‌ پێشوازییه‌كی باشی لێكرا.

به‌همه‌ن قوبادی پێش نمایش كردنی فیلمه‌كه‌ی له‌ وه‌ڵامی پرسیارێكی ئاژانسی فرانس پرێسدا، گوتی: "دوای كۆتایی هاتنی فیستیڤاڵی كان ره‌نگه‌ نه‌چمه‌وه‌ بۆ ئێران، چونكه‌ ئه‌گه‌ر چ به‌ شێوه‌ی فه‌ره‌می له‌ ئێران پێم نه‌گوتراوه‌ كه‌ كاری سینه‌ما نه‌كه‌م، به‌ڵام مۆڵه‌تی وێنه‌گرتن و سازكردنی فیلمم پێی نادرێت. هه‌موو شتێك بۆ من ره‌شه‌، من ته‌مه‌نم 40 ساڵه‌، ژیانم نییه‌، رێ و شوێنم نییه‌، ئه‌گه‌ر برۆمه‌وه‌ چۆن ده‌توانم فیلم سازبكه‌م؟ من ئێستا ون بووم، نازانم كێم، لێره‌ بمێنمه‌وه‌ یا برۆمه‌وه‌."

قوبادی كه‌ له‌گه‌ڵ ئه‌كته‌ری ناوداری سینه‌مای ئێران حامید بێهداد له‌ لایه‌ن بینه‌رانه‌وه‌ به‌ چه‌پڵه‌ پێشوازی لێكرا، رایگه‌یاند: له‌ كاتی سازكردنی ئه‌م فیلمه‌ دوجار ناچاربووم به‌ درۆ بڵێیم ئێستا فیلمێكی دیكۆمنێتی له‌سه‌ر ماده‌ سڕكه‌ره‌كان سازده‌كه‌م. له‌ كاتی سازكردنی فیلمه‌كه‌ له‌ ترسی زۆر، 17 رۆژی وێنه‌گرتنی ئه‌م فیلمه‌ بۆ من به‌ 17 مانگ تێپه‌ڕی، چونكه‌ ئێمه‌ مۆڵه‌تی سازكردنی ئه‌م فیلمه‌مان نه‌بوو، به‌رده‌وام نیگه‌ران بووم، هه‌ر به‌م هۆیانه‌ به‌ خێرایی دیمه‌نه‌كانی فیلمه‌كه‌مان ده‌گرت تاكوو له‌ لایه‌ن پۆلیسه‌وه‌ شوێنی وێنه‌گرتنی فیلمه‌كه‌ نه‌بیندرێته‌وه‌. دووجار له‌ لایه‌ن پۆلیسه‌وه‌ ستافی ئاماده‌كردنی فیلمه‌كه‌ گیران و له‌ ئاكامدا DVD فیلمه‌كانی پێشووم به‌ پۆلیسدا و ئه‌وانم رزگار كرد."

سینه‌ماكای كورد سه‌باره‌ت به‌ به‌شداری رۆكسانا سابیری له‌م خوله‌ی فیستیڤاڵی كان، گوتی: "رۆكسانا یه‌كێك له‌ نووسه‌رانی سیناریۆی فیلمی سینه‌مایی "كه‌سێك له‌ پشیله‌ ئێرانییه‌كان خه‌به‌ری نییه‌ ...! و به‌ هۆی مانه‌وه‌ی له‌ ئێران و هه‌روه‌ها سه‌فه‌ر كردنی رۆژی پێنجشه‌ممه‌ی له‌ گه‌ڵ بنه‌ماڵه‌كه‌ی بۆ ده‌ره‌وه‌ی وڵاتی ئێران، نه‌یتوانی له‌ رێوڕه‌سمی نمایش كردنی فیلمه‌كه‌ له‌ فیستیڤاڵی كان به‌شداربێت."

ده‌رهێنه‌ری فیلمی سینه‌مایی "كه‌سێك له‌ پشیله‌ ئێرانییه‌كان خه‌به‌ری نییه‌ ...!" سه‌باره‌ت به‌ دوو ئه‌كته‌ری سه‌ره‌كی فیلمه‌كه‌ به‌ ناوه‌كانی نیگار شه‌قاقی و ئه‌شكان كووشانفه‌ر كه‌ له‌م فیلمه‌دا رۆڵی ژیانی خۆیان ده‌بینن، گوتی: "ئه‌م دوو ئاوازدانه‌ره‌م ئه‌و كاته‌ بینی كه‌ بۆ كارێكی خۆم سه‌ردانی ستۆدیۆیه‌كی تۆماركردن چووبووم، له‌وانه‌وه‌ فێربووم كه‌ چۆن ئه‌وان موزیكێكی ژێرزه‌وینی سازده‌كه‌ن منیش ده‌توانم فیلمێكی ژێزه‌وینی به‌ بێ مۆڵه‌تی كه‌سێك ساز بكه‌م و ئاكامی كاره‌كه‌م ئه‌وه‌ بوو كه‌ ئه‌م فیلمه‌ له‌ ماوه‌ی 17 رۆژدا سازكرد."

هه‌روه‌ها گوتی: "من ماوه‌یه‌كی زۆر به‌ دوای ئه‌وه‌وه‌ بووم بتوانم مۆڵه‌تی سازكردنی فیلمه‌ نوێكه‌م له‌ به‌رپرسانی سینه‌مای ئێران وه‌ربگرم به‌ڵام ئیزنی سازكردنی ئه‌م فیلمه‌ به‌ من نه‌درا و له‌ ئاكامدا ناچاربووم به‌ نهێنی سازی بكه‌م."

به‌همه‌ن قوبادی له‌ كۆتایی قسه‌كانیدا گوتی: "سوپاسی ته‌واوی ئه‌كته‌ره‌كانی فیلمه‌كه‌م ده‌كه‌م بۆ ئه‌وه‌ی كه‌ بۆ جارێكی دیكه‌ وزه‌ی خوڵقێنه‌ری منیان بووژانده‌وه‌."  

جێی ئاماژه‌ پێدانه‌ ئه‌كته‌ره‌ سه‌ره‌كییه‌كانی فیلمی سینه‌مایی "كه‌سێك له‌ پشیله‌ ئێرانییه‌كان خه‌به‌ری نییه‌ ...! به‌ ناوه‌كانی حامید بێهداد، نیگار شه‌قاقی و ئه‌شكان كووشانفه‌ر له‌گه‌ڵ به‌همه‌ن قوبادی له‌ 62مین خولی فیستیڤاڵی نێونه‌ته‌وه‌یی فیلمی كان 2009 ئاماده‌بوون و له‌سه‌ر مافووره‌ی سووری ئه‌م فیستیڤاڵه‌ له‌ به‌رچاوی كامێراكانی ده‌زگاكانی راگه‌یاندنی دنیا پێكه‌وه‌ وێنه‌ی بیره‌وه‌ریان گرت.

شه‌ست و دووه‌مین خولی فیستیڤاڵی نێونه‌ته‌وه‌یی فیلمی كان 2009 له‌ ژێر كاریگه‌ری نمایش كردنی نوێترین فیلمی به‌همه‌ن قوبادی ده‌ستی پێكرد و له‌ به‌شی "جۆرێك روانین"دا 19 فیلمی سینه‌مایی دیكه‌ له‌ ده‌رهێنه‌ره‌كانی سه‌رتاسه‌ری دنیا نمایش ده‌كرێن. ناوی ئه‌ندامانی لێژنه‌ی ناوبژیوانانی ئه‌م به‌شه‌ی فیستیڤاڵی كان بریتین له‌: پائۆلۆ سوورێنتینۆ ده‌رهێنه‌ر و سیناریۆنووسی ناوداری ئیتاڵی، جولی گیایت ئه‌كته‌ری فه‌ره‌نسی، پیرێز هه‌ندلینگ سه‌رۆكی فیستیڤاڵی تورێنتۆ، ئۆمادا كووها رۆژنامه‌نووسی هیندی و ماریت كاپلا له‌ فیستیڤاڵی سوید.

 گروپی موزیكی كامكاران كه‌ ئێستا بۆ پێشكه‌ش كردنی زنجیره‌ كۆنسێرتێك سه‌ردانی وڵاتی ئه‌مه‌ریكایان كردووه‌ له‌گه‌ڵ گروپی موزیكی "كۆارتێتی كرۆنۆس" ئه‌مه‌ریكی كه‌ یه‌كێكه‌ له‌ گروپه‌ به‌رچاوه‌كانی بواری موزیكی تێكه‌ڵاوی رۆژهه‌ڵات و رۆژئاوا، پرۆڤه‌ ده‌كه‌ن تاكوو له‌ داهاتوودا له‌ ئێران و ئه‌مه‌ریكا پێكه‌وه‌ كۆنسێرتی هاوبه‌ش پێشكه‌ش بكه‌ن.

گروپی موزیكی "كۆارتێتی كرۆنۆس" یه‌كێكه‌ له‌ گروپه‌ ناوداره‌كانی بواری موزیك له‌ دنیادا كه‌ تا ئێستا له‌گه‌ڵ گروپه‌ جۆراوجۆره‌كانی موزیك له‌ وڵاتانی هێندستان، ئازه‌ربایجان، ئه‌فریقیا و هه‌روه‌ها چه‌ندین وڵاتی دیكه‌ به‌ شێوه‌ی موزیكی تێكه‌ڵاو كۆنسێرتیان پێشكه‌ش كردووه‌.

جیێ ئاماژه‌ پێدانه‌ گروپی موزیكی كامكاران به‌ ده‌نگی گۆرانیبێژان بیژه‌ن كامكار و خاتوو سه‌با كامكار و به‌ سه‌رپه‌ڕشتی هووشه‌نگ كامكار، له‌ شاره‌كانی تۆرێنتۆ، ڤه‌نكۆڤێر له‌ وڵاتی كه‌نه‌دا و هه‌روه‌ها له‌ درێژه‌ی به‌رنامه‌كه‌یاندا له‌ شاره‌كانی سیاتێل، سان فرانسیسكۆ، لۆس ئانجلێس، سه‌ن دیگۆ، شیكاگۆ، واشینگتۆن و هه‌روه‌ها دوێنێ شه‌وی یه‌كشه‌مه‌ 8ی مارچی 2009 له‌ شاری نیۆیۆرك له‌ وڵاتی ئه‌مه‌ریكا كۆنسێرتی گۆرانی و موزیكی كوردی و فارسیان به‌ سه‌ركه‌وتووییه‌وه‌ پێشكه‌ش كرد.

جێی وه‌بیرهێنانه‌وه‌یه‌ گروپی موزیكی كامكاران رۆژی هه‌ینی 26ی سێپته‌مبه‌ری 2008 رێكه‌وتی 5ی ره‌زبه‌ری 1387ی هه‌تاوی له‌ فیستیڤاڵی "باربیكه‌ن سه‌نتێر" Barican Canter له‌ وڵاتی به‌ریتانیا له‌گه‌ڵ گروپی موزیكی "كۆارتێتی كرۆنۆس" كه‌ له‌ وڵاتی ئه‌مه‌ریكاوه‌ بۆ پرۆڤه‌كردن هاتبوون بۆ وڵاتی به‌ریتانیا پرۆڤه‌ هاوبه‌شیان ئه‌نجامدا.

له‌م باره‌یه‌وه‌ هونه‌رمه‌ندی موزیكزانی كورد و ئه‌ندامی گروپی موزیكی كامكاران ئه‌رسه‌لان كامكار پێش گه‌شته‌كه‌یان بۆ وڵاتی كه‌نه‌دا له‌ دیدارێكی تایبه‌ت به‌ ئاژانسی هه‌واڵی په‌یامنێر، گوتی: "به‌ خۆشحالییه‌وه‌ هونه‌رمه‌ندی گۆرانیبێژ بیژه‌ن كامكار دوای تێپه‌ڕكردنی قۆناغه‌كانی دوای نه‌شته‌رگه‌ری گه‌ده‌، شه‌وی 19ی فێبرییه‌ی 2009 رێكه‌وتی 1ی ره‌شه‌مه‌ی 1387ی هه‌تاوی، بۆ یه‌كه‌می جار له‌ كۆنسێرتی گۆرانی و موزیكی كوردی و فارسی به‌ ده‌نگی خۆش و هه‌روه‌ها به‌ ژه‌نینی ئامێری ده‌ف و روباب، له‌ شاری تۆرێنتۆ له‌ وڵاتی كه‌نه‌دا گروپی موزیكی كامكاران هاوڕێیه‌تی ده‌كات."

كامكار سه‌باره‌ت به‌و مه‌قام و گۆرانیانه‌ كه‌ پێشكه‌شی ده‌كه‌ن، گوتی: "ئه‌م كۆنسێرته‌ی گروپی موزیكی كامكاران له‌ دوو به‌شی گۆرانی كوردی و موزیكی سونه‌تی ئێران به‌ ئاوازدانه‌ری خۆم و هونه‌رمه‌ند هوشه‌نگ كامكار به‌ڕێوه‌ده‌چێت، هه‌ر ئه‌و ئاواز و گۆرانیانه‌ پێشكه‌ش ده‌كه‌ین كه‌ له‌ كۆنسێرتی 16ی ئۆكتۆبری 2008 رێكه‌وتی 25ی ره‌زبه‌ری ئه‌مساڵدا له‌ هۆڵی گه‌وره‌ی وه‌زاره‌تی كیشوه‌ر، له‌ شاری تاران پێشكه‌شمان كرد."

ئامێرژه‌نی به‌توانای عوود سه‌باره‌ت به‌ كۆنسێرته‌كانی دیكه‌ی گروپی موزیكی كامكاران، گوتی: "بڕیار وایه‌ له‌ رۆژی هه‌ینی 20ی فێبرییه‌ی 2009 له‌ شاری مۆنتراڵ و هه‌روه‌ها له‌ رۆژی 22ی فێبرییه‌ له‌ شاری ڤه‌نكۆڤێر له‌ وڵاتی كه‌نه‌دا كۆنسێرت پێشكه‌ش بكه‌ین."

هونه‌رمه‌ندی موزیكزانی كورد ئه‌رسه‌لان كامكار له‌ كۆتایی ئه‌م دیداره‌دا گوتی: "هه‌روه‌ها بڕیاروایه‌ له‌ درێژه‌ی به‌رنامه‌كانماندا له‌ شاره‌كانی نیۆیۆرك، واشینتۆن، شیكاگۆ، سان فرانسیسكۆ، سه‌ن دییه‌گۆ، سیاتێل و لۆس ئه‌نجلێس له‌ وڵاتی ئه‌مه‌ریكا كۆنسێرت پێشكه‌ش ده‌كه‌ین."

ئه‌ندامانی گروپی موزیكی كامكاران كه‌ له‌ زنجیره‌ كۆنسێرته‌كانی وڵاتانی كه‌نه‌دا و ئه‌مه‌ریكا به‌شداری ده‌كه‌ن، بریتین له‌: هوشه‌نگ كامكار ـ سه‌رپه‌رشتی گروپ و ئاوازدانه‌ر، بیژه‌ن كامكار ـ گۆرانیبێژ و ئامێرژه‌نی ده‌ف و روباب، په‌شه‌نگ كامكار ـ ئامێرژه‌نی سه‌نتوور، ئه‌رسه‌لان كامكار ـ ئاوازدانه‌ر و ئامێرژه‌نی عود، قه‌شه‌نگ كامكار ـ ئامێرژه‌نی سێ تار، ئه‌رژه‌نگ كامكار ـ ئامێرژه‌نی زه‌رب، ئه‌رده‌شیر كامكار ـ ئامێرژه‌نی كه‌مانچه‌، ئه‌رده‌وان كامكار ـ ئامێرژه‌نی سه‌نتوور، سه‌با كامكار ـ گۆرانیبێژ و ئامێرژه‌نی ده‌هۆڵ و هانا كامكار ـ ئامێرژه‌نی ده‌ف.

فیلمی سینه‌مایی "كوێستانی قه‌ندیل" له‌ ده‌رهێنانی ته‌ها كه‌ریمی و به‌رهه‌می به‌رێوه‌به‌رایه‌تی هونه‌ری سینه‌مای سلێمانی، دوای 90 رۆژ كار كردن، كۆتایی به‌ قۆناغی وێنه‌گرتنی هات، برِیار وایه‌ یه‌كه‌م نمایشی دوای ته‌واو بوونی له‌ شاری سلێمانی بێت.     

"كوێستانی قه‌ندیل" باس له‌ پێكه‌وه‌ ژیان و به‌ریه‌ككه‌وتنی چوار نه‌ته‌وه‌ی كورد، فارس، تورك و عه‌ره‌ب ده‌كات له‌ چاوی عاشقانه‌ی سێ كه‌سایه‌تی (ره‌سوڵ فرمێسك، عه‌ینه‌دین ده‌ف و شه‌ماڵی دۆعا) كه‌ بۆ ونبوه‌كانی خۆیان و چوار نه‌ته‌وه‌ی دراوسێ ده‌گه‌رێن.

ئازاد سه‌وزه‌ به‌رێوه‌به‌ری به‌رێوه‌به‌رایه‌تی هونه‌ری سینه‌مای سلێمانی سه‌باره‌ت به‌ كۆتایی هاتنی قۆناغی وێنه‌گرتن رایگه‌یاند كه‌ به‌رهه‌مه‌كه‌ هه‌روه‌ك ئه‌وه‌ی پێشتر چاوه‌رِوان ده‌كرا چ وه‌ك كوالیتی و چ لایه‌نی به‌رهه‌مهێنان به‌ سه‌ركه‌وتوویی كۆتایی پێهاتووه‌.

سه‌وه‌زه‌ وتیشی "ئه‌م به‌رهه‌مه‌، به‌رهه‌می وه‌زاره‌تی رۆشنبیرییه‌ بۆیه‌ ئێمه‌ هه‌وڵده‌ده‌ین به‌ رێككه‌وتن له‌گه‌ڵ ده‌رهێنه‌ری كاره‌كه‌ یه‌كه‌م نمایشی له‌ شاری شلێمانی بێت، ئه‌مه‌ش بۆ خستنه‌ رووی ئاستی به‌شداربووان و نمایشكردنی به‌رهه‌مێكی باش بۆ بینه‌رانی ئه‌و شاره‌".

عه‌بدوره‌حمان محه‌مه‌د به‌رێوه‌به‌ری به‌رهه‌م فیلمی "كوێستانی قه‌ندیل" مژده‌ی فیلمێكی سه‌ركه‌وتوو به‌ بینه‌ران ده‌دات و وتی "كاره‌كه‌مان قۆناغی یه‌كه‌می ته‌واوو بووه‌ و ده‌چیت بۆ مونتاژ و دیاری نییه‌ كه‌ دوای ئه‌وه‌ چۆن ده‌بێت، به‌ڵام له‌ رووی ماندووبوون كاری ستافه‌كه‌ من مژده‌ی ئه‌وه‌ ده‌ده‌م به‌ بینه‌ران كه‌ یه‌كێك له‌ باشترین فیلمه‌كانی كوردستان ده‌بێت".

به‌رِێوه‌به‌ری به‌رهه‌م ده‌ستخۆشی له‌ وه‌زاره‌تی رۆشنبیری و به‌رێوه‌به‌رایه‌تی هونه‌ری سینه‌مای سلێمانی كرد و پێیشوایه‌ كه‌ وه‌ك به‌رێوه‌به‌ری به‌رهه‌م، قورسترین كار بووه‌ كه‌ ئه‌و كردویه‌تی به‌ هۆی بڵاوی لۆكه‌یشنه‌كانیان و كه‌شوهه‌وا و بارودۆخی تایبه‌تی كاره‌كه‌وه‌، روونیشی كرده‌وه‌ "ئێمه‌ به‌و كوالیتیه‌ی كه‌ ویستومان كارمان كردووه‌ و هیوادارم ئه‌م فیلمه‌ هه‌نگاوی یه‌كه‌م بێت بۆ كاری فیلم له‌ سلێمانی".
 
به‌رێوه‌به‌ری به‌رێوه‌به‌رایه‌تی هونه‌ری سینه‌مای سلێمانی هه‌وڵ و ماندوو بوونی هه‌موو ئه‌كته‌ره‌كان و به‌شداربووانی كاره‌كه‌ی به‌رز نرخاند و گوتیشی "خۆشه‌ویستی و ماندوبوون و كاری لێ نه‌برِاوانه‌ی جه‌لال ساعدپه‌نا یاریده‌ده‌ری ده‌رهێنه‌ر، كه‌یوان یوسفی وێنه‌گركاره‌كه‌، عه‌بدولرِه‌حمان محه‌مه‌د و رێبوار حه‌مه‌ هه‌ورامی، هه‌روه‌ها سه‌باح ئه‌حمه‌د محه‌مه‌د ته‌كنیككار كه‌ كاری دورستكردنی هه‌موو ئامێره‌كانی جوڵه‌ی كامێرای له‌سه‌ر شانی ئه‌وو بووه‌، جیگای ده‌ستخۆشیه‌".

د. قوتبه‌دین سادقی ئه‌كته‌ری فیلمی كوێستانی قه‌ندیل باس له‌وه‌ده‌كات كه‌ چیرۆكی فیلمی كوێستانی قه‌ندیل له‌ ناخی كلتوری كورده‌وارییه‌وه‌ سه‌رچاوه‌ی گرتووه‌ و روانگه‌ی كامێرا روانگه‌یه‌كی عاشقانه‌یه‌ و پێیوایه‌ كه‌ ئه‌م به‌رهه‌مه‌ جیاوازه‌ له‌ به‌رهه‌مه‌كانی دیكه‌ی كوردستان و به‌ كارێكی سه‌ركه‌وتووی ناوبرد.

رێوڕه‌سمی كۆتایی  27مین خولی فیستیڤاڵی نێونه‌ته‌وه‌یی فیلمی فه‌جر، شه‌وی سێشه‌ممه‌ به‌ ئاماده‌بوونی وه‌زیری فه‌رهه‌نگ و ئیرشادی ئیسلامی ئێران دكتۆر محه‌مه‌د حوسێن سه‌فار هه‌ره‌ندی، سه‌رۆكی كۆمیسیۆنی فه‌رهه‌نگی په‌رله‌مانی ئێران دكتۆر غوڵامحوسێن حه‌داد عادل، بریكاری هونه‌ری وه‌زیری ئیرشاد له‌ كاروباری سینه‌مایی محه‌مه‌د حوسێن جه‌عفه‌ری جیلوه‌، به‌رپرسانی فیستیڤاڵ، ئه‌ندامانی لێژنه‌ی ناوبژیوانی به‌شه‌ جۆراوجۆره‌كانی فیستیڤاڵ، ئه‌كته‌ره‌ ناوداره‌كانی سینه‌ما و ته‌له‌فیزیۆنی ئێران، سینه‌ماكارانی به‌شداربوو له‌ فیستیڤاڵ و هه‌روه‌ها ژماره‌یه‌كی به‌رچاو له‌ هۆگرانی هونه‌ری سینه‌ما له‌ ته‌لاری گه‌وره‌ی وه‌زاره‌تی كیشوه‌ر له‌ شاری تاران به‌ڕێوه‌چوو.

ئه‌ندامانی لێژنه‌ی ناوبژیوانی به‌شی كێبڕكێی فیلمه‌ دیكۆمێنتییه‌كانی سینه‌مای ئێران به‌ ناوی "چشم واقعیت ـ سینه‌مای مستند"" واته‌ "چاوی واقعییه‌ت ـ سینه‌مای دیكۆمێنت" له‌ 27مین خولی فیستیڤاڵی نێونه‌ته‌وه‌یی فیلمی فه‌جر، كه‌ بریتی بوون له‌: ته‌هماسب سوڵحجوو، مه‌نووچێهر ته‌یاب، محه‌مه‌د ره‌زا عه‌ره‌ب، فه‌رید فه‌رخونده‌كیش و محه‌مه‌دره‌زا موختاری، دوای بینینی 30 فیلمی دیكۆمێنتی له‌ سینه‌ماكارانی سه‌رانسه‌ری ئێران، خه‌ڵاتی تایبه‌تی خۆیان كه‌ بریتی بوو له‌: سیمورغی بلوورینی به‌شی دیكۆمێنتی كورت و بڵندی فیستیڤاڵ و هه‌روه‌ها سه‌یاره‌یه‌كی جۆری پراید، پێشكه‌شیان كرد به‌ خاتوو فریشته‌ جوغه‌تایی بۆ سازكردنی كورته‌ فیلمی دیكۆمێنتی "چه‌ سر سبز بود دره‌ ما" واته‌ "چه‌ سه‌ر سه‌وز بوو شیوو دۆڵی ئێمه‌" له‌ وێنه‌گرتنی سینه‌ماكاری كورد تووره‌ج ئه‌سڵانی.

هه‌روه‌ها هه‌ر له‌م به‌شه‌ی فیستیڤاڵدا كورته‌ فیلمی "حباب سرد" واته‌ "بلۆقی سارد" له‌ ده‌رهێنانی ئه‌میر جوغه‌تایی و له‌ به‌رهه‌مهێنانی تووره‌ج ئه‌سڵانی دیپڵۆمای شانازی
و بڕی پاره‌ی 2 میلیۆن تومه‌نی (2 هه‌زار دۆلار)ی پێبه‌خشرا.

جێی ئاماژه‌ پێدانه‌ سیمورغی بلوورینی فیستیڤاڵی فه‌جر، یه‌كێكه‌ له‌ گرنگترین و به‌نرخترین خه‌ڵاته‌كانی سینه‌مای ئێران كه‌ ته‌نیا له‌ فیستیڤاڵی نێونه‌ته‌وه‌یی فیلمی فه‌جر، پێشكه‌ش به‌ هونه‌رمه‌ندانی سه‌ركه‌وتوو ده‌كرێت، بوونی ئه‌م خه‌ڵاته‌ له‌ ئه‌رشیڤی سینه‌ماكارانی ئێران شانازییه‌كی گه‌وره‌یه‌. هه‌موو ساڵێك سینه‌ماكارانی سه‌رانسه‌ری ئێران به‌ تامه‌جرۆییه‌وه‌ به‌رهه‌مه‌كانی خۆیان بۆ نه‌وسینگه‌ی فیستیڤاڵ ده‌نرێن و دوای هه‌ڵسه‌نگاندن له‌ لایه‌ن لێژنه‌یه‌كی تایبه‌ته‌وه‌ له‌ ماوه‌ی 10 رۆژدا له‌ سینه‌ماكانی شاری تاران نمایش ده‌كرێن و پاشان له‌ رێوڕه‌سمی كۆتایی فیستیڤاڵ خه‌ڵات به‌سه‌ر هونه‌رمه‌ندانی سه‌ركه‌وو دابه‌شده‌كرێت.

جێی وه‌بیرهێنانه‌وه‌یه‌ كورته‌ فیلمی دیكۆمێنتی "چه‌ سه‌ر سه‌وز بوو شیوو دۆڵی ئێمه‌" له‌ وێنه‌گرتنی تووره‌ج ئه‌سڵانی و له‌ ده‌رهێنانی هاوسه‌ره‌كه‌ی فریشته‌ جوغه‌تایی له‌ به‌شی كێبڕكێی فیلمه‌ دیكۆمێنتییه‌كانی سینه‌مای ئێران له‌ 27مین خولی فیستیڤاڵی نێونه‌ته‌وه‌یی فیلمی فه‌جر، له‌ دوو سانسی جیاوازدا له‌ سینه‌ماكانی شاری قسه‌ (ئازادی 2) و شاری هونه‌ر (ئازادی 4) نمایش كرا.

جێی ئاماژه‌ پێدانه‌ 27مین خولی فیستیڤاڵی نێونه‌ته‌وه‌یی فیلمی فه‌جر له‌ رۆژانی 12 تا 22ی رێبه‌ندانی 1387ی هه‌تاوی رێكه‌وتی 31ی ژانوییه‌ تا 10ی فێبرییه‌ی 2009 به‌ به‌شداری به‌رهه‌می سینه‌ماكارانی وڵاتانی بیانی و سه‌رانسه‌ری ئێران له‌ چه‌ندین به‌شی جۆراوجۆردا له‌ سینه‌ماكانی شاری تاران به‌ڕێوه‌چوو، له‌وانه‌: "سه‌ودای سیمورغ: كێبڕكێی سینه‌مای ئێران"، "كێبڕكێی فیلمه‌ ڤیدیۆییه‌كانی ئێران"، "كێبڕكێی فیلمه‌ دیكۆمێنتییه‌كان"، "جام جهان نما ـ كێبڕكێی نێونه‌ته‌وه‌یی"، "سینه‌مای معناگرا"، "كێبڕكێی سینه‌مای ئاسیا"، "كێبڕكێی موادی ته‌بلیغی"، "كێبڕكێی كورته‌ فیلمه‌ چیرۆكییه‌كان"، "چاوی واقعییه‌ت ـ كێبڕكێی به‌رهه‌مه‌ كورت، نیوه‌ بڵند و فیلمه‌ بڵنده‌ دیكۆمێنتییه‌كانی سینه‌مای ئێران"، "نمایشه‌ تایبه‌ته‌كان"، "سینه‌مای شرقی ـ سینه‌مای غه‌ربی، سینه‌مای كۆریای باكوور و ئه‌ڵمانیا دوای ساڵی 2000" و هه‌روه‌ها چه‌ندین به‌شی گرینگی دیكه‌.

"مه‌ترسن ئێمه‌ش وه‌ك ئێوه‌ رێبوارین"، یه‌كێك له‌ ره‌سته‌كانی سناریۆی فیلمی "كوێستانی قه‌ندیل"ـه‌، كه‌ له‌ زمانی ره‌سوڵی فرمێسك (یه‌كێك له‌ ئه‌كته‌ره‌ سه‌ره‌كییه‌كانی فیلمی كوێستانی قه‌ندیل)، به‌ هه‌رچوار زمانی كوردی، توركی، فارسی و عه‌ره‌بی دوپات ده‌بێته‌وه‌، بیستنی چوار زمانی جیاواز ئاماژه‌یه‌كه‌ بۆ رێگه‌پێدان به‌ ده‌ركه‌وتنی چوار نه‌ته‌وه‌، كه‌ له‌ ناوچه‌یه‌كدا ده‌ژین و زۆرترین په‌یوه‌ندیان به‌یه‌كه‌وه‌ هه‌یه‌ و بانگه‌شه‌یه‌كه‌ بۆ پێكه‌وه‌ ژیان و له‌یه‌كتێگه‌یشتن، چیرۆكی ئه‌و فیلمه‌ له‌ زمانی 4 ئه‌كته‌ری سه‌ره‌كی و چه‌ندین هونه‌رمه‌ندی دیكه‌ی باشور و رۆژهه‌ڵاتی كوردستان و 120 ئه‌كته‌ری لاوه‌كی  ئه‌و چوار نه‌ته‌وه‌یه‌وه‌ ده‌گێردرێته‌وه‌.

سێ هونه‌رمه‌ندی ناوداری كورد رۆڵی سه‌ره‌كی له‌  فیلمی كوێستانی قه‌ندیلدا ده‌گێرن ئه‌وانیش دكتۆر قوتبه‌دین سادقی هونه‌رمه‌ندی شانۆكاری رۆژهه‌ڵاتی كوردستان، عه‌ینه‌دین مه‌ریوانی و جومه‌رد هونه‌رمه‌ندی گۆرانیبێژی باكووری كوردستان، یه‌كێك له‌ رۆڵه‌كانیتر له‌ لایه‌ن میوانی به‌رهه‌م، كامه‌ران رئوف هونه‌رمه‌ندی شانۆكاری باشووری كوردستانه‌وه‌ به‌رجه‌سته‌ ده‌كرێت.

ته‌ها كه‌ریمی ده‌رهێنه‌ری فیلمی سینه‌مایی "كوێستانی قه‌ندیل" له‌باره‌ی ئه‌م فیلمه‌وة وتی "ئه‌م فیلمه‌ باس له‌ رابردوو و ئێستای په‌یوه‌ندییه‌كانی چوار نه‌ته‌وه‌ی دراوسێ كورد، تورك، عه‌ره‌ب و فارس ده‌كات، كه‌ له‌ جوگرافیایه‌كی وه‌ك كوێستانی قه‌ندیل به‌یه‌ك ده‌گه‌ن و هه‌وڵ ده‌دات چیرۆكێكی سینه‌مایی بگێرێته‌وه‌".

عه‌بدوره‌حمان محه‌مه‌د ره‌حمان به‌رێوه‌به‌ری به‌رهه‌می فیلمی "كوێستانی قه‌ندیل" سه‌باره‌ت به‌ ستافی كاره‌كه‌یان وتی "ئه‌م فیلمه‌ زۆربه‌ی ستافه‌كه‌ی پرۆفیشناڵه‌ و له‌ وڵاتی ئێرانه‌وه‌ هاتوون و هۆكاره‌كه‌شی گه‌رانده‌وه‌ بۆ نه‌بوونی ستافی پشت كامێرا له‌ هه‌رێمی كوردستان".

هه‌روه‌ها وتیشی "كوالیته‌مان زۆر لا گرنگ بووه‌، بۆیه‌ هه‌وڵمانداوه‌ و هه‌وڵ ده‌ده‌ین كارێكی باش پێشكه‌ش به‌ بینه‌ری كورد و جیهان بكه‌ین".

ده‌رهێنه‌ر و سینارێستی "كوێستانی قه‌ندیل" له‌ كاره‌ نوێكه‌یدا باس له‌ گێرانه‌وه‌یه‌كی جیاواز ده‌كات و وتی "ئه‌وه‌ی به‌لامه‌وه‌ گرنگ بووه‌ گێرِانه‌وه‌یه‌كی سینه‌مایی و هه‌وڵدان بۆ دارشتنێكی نوێ بووه‌، حه‌زیشم نه‌كردووه‌ به‌ زۆر بیكه‌م به‌ گێرانه‌وه‌یه‌كی جیاواز به‌ڵكوو به‌پێی پێویستی گێرانه‌وه‌ و زه‌روره‌تی چیرۆكه‌كه‌ دارشتنی نوێ هاتووه‌".

ئازاد سه‌وزه‌ به‌رێوه‌به‌ری به‌رێوه‌به‌رایه‌تی هونه‌ری سینه‌مای سلێمانی سه‌باره‌ت به‌ قۆناغه‌كانی دورستكردنی فیلمی سینه‌مایی كوێستانی قه‌ندیل باسی له‌وه‌ كرد كه‌ سه‌ره‌تا، به‌هۆی ته‌نگه‌ژه‌ی داراییه‌وه‌ ئه‌نجومه‌نی وه‌زیران برِیاری یه‌كلاكه‌ره‌وه‌ی له‌سه‌ر بودجه‌كه‌ی فیلمه‌كه‌ نه‌داوه‌ و دواجار به‌ خستنه‌رووی ده‌رخسته‌یه‌كی دیكه‌ توانیویانه‌ كه‌ ره‌زامه‌ندی وه‌زاره‌تی رۆشنبیری وه‌رگرن و وتیشی "هه‌وڵمانداوه‌ لای ئێمه‌ش له‌ سلێمانی فیلمی درێژ ئاقاری خۆی ببرِێت و تاراده‌یه‌كیش سه‌ركه‌وتوو بووین".

هه‌روه‌ها وتیشی "له‌ رووی به‌رهه‌مهێنانه‌وه‌ كاره‌كه‌مان به‌ باشی ده‌چێته‌ پێشه‌وه‌ و هه‌وڵمانداو كه‌ هیچ كێشه‌و گرفتێكی ده‌ره‌كی كاریگه‌ری نه‌بێت له‌سه‌ر ئاست و به‌رێوه‌چوونی كاره‌كه‌مان و ئه‌وه‌ی گرنگه‌ ئاستی به‌رز و چۆنیه‌تی كاره‌كه‌یه‌".

به‌رێوه‌به‌ری به‌رێوه‌به‌رایه‌تی هونه‌ری سینه‌مای سلێمانی باس له‌وه‌ ده‌كات كه‌ به‌شدارانی فیلمی قه‌ندیل تا ئێستا هیچ كێشه‌و گرفتێكی ته‌كنیكی و كارگێری دروست نه‌كردووه‌ بۆ به‌رێوه‌به‌رایه‌تییه‌كه‌یان وتیشی "ئه‌و خه‌مخۆری دڵسۆزییه‌ی كه‌ له‌ ناو ستافی ئه‌و كاره‌دا بینیومانه‌ هیوادارین بتوانێت ریگه‌ خۆشكه‌ر بێت بۆ دورستكردنی فیلمی سینه‌مایی به‌ شێوازی ئه‌كادیمی".

ئه‌م فیلمه‌ ماوه‌ی 3 مانگ پێش به‌رهه‌مهێنان كاری بۆ كراووه‌ و 3 مانگیش دیاریكراوه‌ بۆ وێنه‌گرتنی، عه‌بدولرِه‌حمان محه‌مه‌د ره‌حمان به‌رِێوه‌به‌ری به‌رهه‌مهێنانی ئه‌م فیلمه‌ گوتی "ئێمه‌ پێش به‌رهه‌مهێنان هه‌وڵمانداوه‌ باشترین و گونجاوترین شوێن دیاری بكه‌ین بۆ وێنه‌گرتن بۆیه‌ زۆربه‌ی شوێنه‌كانی باشوری كوردستان گه‌راین و كاری دیكۆراتی ئه‌و شوینانه‌ی كه‌ هه‌مان بوو وای لێكردین كه‌ 3 مانگمان پێبچێت و ئێستاش قۆناغی وێنه‌گرتن له‌ نیوه‌دایه‌". 

فیلمی سینه‌مایی كوێستانی قه‌ندیل به‌رهه‌می به‌رێوه‌به‌رایه‌تی هونه‌ری سینه‌مای سلێمانی سه‌ر به‌ وه‌زاره‌تی رۆشنبیری هه‌رێمی كوردستانه‌، ته‌ها كه‌ریمی كاری ده‌رهێنان و كه‌یوان یوسفی كاری وێنه‌گرتنی ده‌كات.

 ته‌ها كه‌ریمی له‌دایك بووی ساڵی 1976 له‌شاری بانه‌ له‌ رۆژهه‌ڵاتی كوردستان، سه‌ره‌تای كاری به‌نووسینی چیرۆك ده‌ست پێكردووه‌، ساڵی 2004 له‌زانكۆی هونه‌ری تاران له‌به‌شی سینه‌ما به‌كالۆریۆسی وه‌رگرتووه‌، تا ئێستا جگه‌ له‌ فیلمی سینه‌مایی كوێستانی قه‌ندیل، 4 فیلمی كورتی به‌ناوه‌كانی "سنوری ژین"، "زریان"، "سه‌مای مروارییه‌كان" و "كوێستانی سپی" ساز كردووه‌.

پێناسه‌ی فیلم:
ناوی فیلم : كوێستانی قه‌ندیل
سناریۆ و ده‌رهێنان: ته‌ها كه‌ریمی
وێنه‌گر: كه‌یوان یوسفی
به‌رنامه‌رێژ و یاریده‌ده‌ری یه‌كه‌می ده‌رهێنه‌ر: جه‌لال ساعدپه‌نا
ده‌نگ هه‌ڵگر: تاهیر پیشوایی
ئه‌كته‌ر: د. قوتبه‌دین سادقی، جومه‌رد قاره‌مان، عه‌ینه‌دین مه‌ریوانی، كامه‌ران رئوف،له‌میا حسێن، كه‌مال جه‌لال قادر و .......
به‌رێوه‌به‌ری به‌رهه‌م: عه‌بدولرِه‌حمان محه‌مه‌د
به‌رهه‌مهێنه‌ر : به‌رێوه‌به‌رایه‌تی هونه‌ری سینه‌مای سلێمانی

ئه‌مرِۆ دووشه‌ممه‌ فه‌له‌كه‌دین كاكه‌یی وه‌زیری رۆشنبیری حكومه‌تی هه‌رێمی كوردستان پێشوازی له‌ د.فریدریك تیسو قونسولی فه‌ره‌نسی له‌ هه‌ولێر، ئامیلی بانزیه‌ به‌رِێوه‌به‌ری ناوه‌ندی رۆشنبیری فه‌ره‌نسی و شاندێكی سینه‌ماكاران كرد، كه‌ پێكهاتبوون له‌ ئه‌ندازیار فریدریك نامۆر كه‌ خاوه‌نی 80 هۆڵی سینه‌مایه‌ له‌ فه‌ره‌نسا و هیوگ دی ڤارڤان كه‌ بزنسمانێكی فه‌ره‌نسییه‌و پاڵپشتی بواری سینه‌مایه‌ له‌ وڵاته‌كه‌ی.

ئه‌ندازیار فریدریك نامۆر ئه‌وه‌ی روونكرده‌وه‌ كه‌ مه‌به‌ست له‌م سه‌ردانه‌یان له‌ سه‌ر داوای قونسولی فه‌ره‌نسی هاتوون بۆ ئه‌وه‌ی هاوكاری و هه‌مانگی له‌گه‌ڵ سینه‌ماكارانی كوردستان بكه‌ن و كار بۆ نۆژه‌نكردنه‌وه‌ی هۆڵه‌كانی سینه‌ما له‌ كوردستان بكه‌ن و خۆیان ئاماده‌ بكه‌ن بۆ ئه‌نجامدانی فیستیڤاڵێكی سینه‌مایی له‌ هه‌ولێر بۆ نمایشكردنی فیلمی كوردی و فه‌ره‌نسی و ئه‌وروپی كه‌ ببێته‌ ئاهه‌نگێكی خێزانی گه‌وره‌ و چه‌ندر رۆژێك به‌رده‌وام بێت.

بۆ ئه‌م مه‌به‌سته‌ش سوود له‌ پاركی سامی عه‌بدولرِه‌حمان و پاركی مناره‌ وه‌ربگیرێت و ئامێره‌ پێویسته‌كان له‌گه‌ڵ خۆیان دێنن، له‌به‌ر نه‌بوونی هۆڵی سینه‌ما له‌ هه‌ولێر.

هه‌روه‌ها به‌نیازن كه‌ سینه‌مایه‌كی چه‌ند هۆڵی دروست بكه‌ن كه‌ سینه‌ما و كتێبخانه‌ و چه‌ندین بواری دیكه‌ به‌خۆوه‌ بگرێت.

قونسڵی فه‌ره‌نسی ئاماژه‌ی به‌ جه‌ژنی میوزیك كرد كه‌ له‌ رێكه‌وتی 21/6/2009 سازده‌كرێت و داوای له‌ وه‌زیری رۆشنبیری كرد وه‌كو ساڵی رابردوو هاوكارییان بكات.

به‌ پێی راپۆڕتی به‌شی راگه‌یاندنی گشتی ئه‌نجومه‌نی سینه‌مای لاوانی ئێران له‌ شاری تاران، كورته‌ فیلمی كوردی "كوهستان سفید" واته‌ "كوێستانی سپی" له‌ ده‌رهێنانی سینه‌ماكاری بانه‌یی ته‌ها كه‌ریمی له‌ به‌شی كێبڕكێی كورته‌ فیلمه‌كانی 49مین خولی فیستیڤاڵی نێونه‌ته‌وه‌یی فیلمی "بۆرنۆی شانزده‌یه‌م" له‌ وڵاتی كۆماری چیك نمایش كرا.

جێی ئاماژه‌ پێدانه‌ 49مین خولی فیستیڤاڵی نێونه‌ته‌وه‌یی فیلمی "بۆرنۆی شانزده‌یه‌م" له‌ رۆژانی 25 تا 29ی خه‌زه‌لوه‌ری 1387ی هه‌تاوی له‌ شاری بێرنۆ له‌ وڵاتی كۆماری چیك به‌ڕێوه‌چوو.

هونه‌رمه‌ندانی به‌شداربوو له‌ كورته‌ فیلمی چیرۆكی "كوێستانی سپی" بریتین له‌:
نووسه‌ری سیناریۆ: ته‌ها كه‌ریمی.
ده‌رهێنه‌ر: ته‌ها كه‌ریمی.
وێنه‌گر: كه‌یوان یۆسفی.
ده‌نگهه‌ڵگر: عه‌باس ره‌شیدی.
مونتاژ: محه‌مه‌د ره‌زا وه‌ته‌ن دووست.
به‌رهه‌مهێنه‌ر: كةمال جلال.
موزیك: فه‌ردین خه‌لعه‌تبه‌ری.
ماوه‌: 30 خوله‌ك.
به‌رهه‌می ساڵی: 1384 / 2005.

به‌پێی ئه‌و زانیارییانه‌ی ده‌ست ئاژانسی په‌یامنێر گه‌یشتووه‌، براده‌ر كه‌ ئێستا نیشته‌جێی وڵاتی هۆڵه‌ندایه‌ و به‌مه‌به‌ستی كلیپكردنی چه‌ند گۆرانییه‌كی نوێی گه‌ڕاوه‌ته‌وه‌ توركیا، به‌ڵام له‌گه‌ڵ دابه‌زینی له‌ فڕۆكه‌، پۆلیس راپێچی زیندانی كردووه‌.

سه‌باره‌ت به‌ هۆكاری ده‌ستیگیركردنی، براده‌ر به‌ ماڵپه‌ڕی (ئاڤێستا)ی رایگه‌یاند: پۆلیسی فڕۆكه‌خانه‌ پێیان گوتووه‌ له‌به‌ر یه‌كێك له‌ گۆرانییه‌كانی پێشتری دادگای (ئامه‌د) داوای له‌سه‌ر تۆماركردووه‌ و ئه‌مه‌ش بۆته‌ هۆكاری ده‌ستگیركردنی.

هه‌روه‌ها ئاماژه‌یداوه‌ به‌ نیازبووه‌ له‌و سه‌ردانه‌یدا چه‌ند كلیپێك به‌ پاڵپشتی كۆڕه‌ك میوزیك له‌ وڵاتی توركیا تۆمار بكات، به‌ڵام به‌هۆی ده‌ستگیركردنییه‌وه‌ كاره‌ هونه‌رییه‌كانی وه‌ستاوه‌.

جێی ئاماژه‌یه‌ هونه‌رمه‌ندی گۆرانیبێژ براده‌ر له‌ گوندی (موسیكی)ـی سه‌ر به‌ شاری (مێردین)ی باكووری كوردستان له‌ ساڵی 1958 له‌ دایكبووه‌ و باوكیشی كه‌سێكی ده‌نگخۆش ناسراوبووه‌ كه‌ كاریگه‌ری كردۆته‌ سه‌ر ئه‌وه‌ی كوڕه‌كه‌ی ببێته‌ میوزیكژه‌ن و گۆرانیبێژ، له‌ 1986 ـه‌وه‌ باكووری كوردستانی به‌ره‌و وڵاتی هۆڵه‌ندا جێهێشتووه‌ و تاوه‌كو ئێستاش 10 ئه‌لبومی تۆماركراوی هه‌یه‌ و له‌و سه‌ردانه‌یدا نیازی تۆماركردنی ئه‌لبوومی یازده‌هه‌م بوو، دوایین ئه‌لبومیشی به‌ناوی "په‌پولێ" بوو

به‌ پێی راپۆڕتی تایبه‌تی به‌شی هونه‌ری ئاژانسی هه‌واڵی په‌یامنێر له‌ شاری سه‌قز،
حه‌وته‌مین خولی فیستیڤاڵی سه‌رتاسه‌ری شانۆی كوردی به‌ دیاری كردنی هه‌ڵبژێردراوان و باشترینه‌كانی به‌شه‌ جۆراوجۆره‌كانی فیستیڤاڵ له‌ هۆڵی كۆمه‌ڵگه‌ی فه‌رهه‌نگی و هونه‌ری شارستانی سه‌قز كۆتایی به‌ كاره‌كانی خۆی هێنا. لێژنه‌ی ناوبژیوانی ئه‌م فیستیڤاڵه‌ كه‌ پێكهاتبوو له‌ حه‌سه‌ن دادشكه‌ر و حه‌مید ره‌زا نه‌عیمی و ئه‌فشین خورشید باخته‌ری له‌ راگه‌یه‌ندراوی كۆتایی خۆیدا به‌شداری به‌ربڵاو و بیرمه‌ندانه‌ و پڕ هه‌ستی بینه‌رانیان به‌ گه‌وره‌ترین تایبه‌تمه‌ندی فیستیڤاڵی شانۆی كوردی له‌ سه‌قز ناو برد.

ده‌قی ته‌واوی راگه‌یه‌ندراوی لێژنه‌ی ناوبژیوانی حه‌وته‌مین خولی فیستیڤاڵی سه‌رتاسه‌ری شانۆی كوردی كه‌ كۆپییه‌كی بۆ ئاژانسی هه‌واڵ و به‌دواداچوونی كوردستان ـ په‌یامنێر ـ هاتووه‌، به‌م شێوه‌یه‌:

رۆژێكی پیرۆزی دیكه‌ له‌ پانتایی ئاسمانی پڕ له‌ هونه‌ری كوردستان ده‌ستی پێكرد و كوردانی هونه‌رمه‌ند بوونه‌ نمایشكاری عیشق و ئه‌ندێشه‌ و هه‌ست، بۆ ئه‌وه‌ی كه‌ نیشان بده‌ن هه‌تاوی هونه‌ره‌كه‌یان له‌ هه‌موو لایه‌كدا بڵاو بۆته‌وه‌؛ خۆ ئه‌وه‌تانێ هونه‌ر سنوور ناناسێت و كوردانیش هه‌رده‌م به‌ سه‌بره‌وه‌ به‌ بێ داخوازییه‌ك هه‌وڵده‌ر بوونه‌، داهێنه‌رانێك كه‌ له‌ هه‌ر شوێنێك بن سه‌رپه‌نجه‌ی هونه‌ره‌كه‌یان لێوانلێوه‌ له‌ ئاهه‌نگه‌كانی خۆشه‌ویستی و دۆستایه‌تی و هاوڕێیه‌تی.

له‌ دوایین رۆژی فیستیڤاڵدا ئێستاكه‌ شاهیدی ئاماده‌بوونی پڕ له‌ راستی و بێ ریای ئێوه‌ بووین، به‌ دابی دۆستی له‌ سه‌ر خۆمان به‌ پێویستی ده‌زانین كه‌ ئێمه‌ش، داب و نه‌ریتی راستیی به‌جێ بێنین و له‌ گه‌ڵ ئێوه‌ هه‌ر چه‌نده‌ش به‌ كورتی بدوێین، كه‌ ئه‌م په‌یوه‌ندییه‌ یه‌كجار غه‌نیمه‌ته‌ و ئه‌م ئارق رشتنانه‌ی له‌ش و رۆح، یه‌كجار شه‌ریفه‌ و شایانی گه‌وره‌ترین سوپاسه‌كانه‌.

1 ـ به‌شداری به‌ربڵاو و بیرمه‌ندانه‌ و پڕ هه‌ستی بینه‌ران به‌ بێ هیچ وته‌یه‌ك گه‌وره‌ترین تایبه‌تمه‌ندی فیستیڤاڵی شانۆی كوردی بوو. ئه‌مه‌ سه‌رمایه‌یه‌كه‌ كه‌ كه‌سانێكی زۆر له‌ حه‌سره‌تی ئه‌وه‌دان. كه‌وایه‌ ده‌بێ سوپاس بكرێ له‌م خه‌ڵكه‌ خاوه‌ن هونه‌ره‌، به‌ پێداویستییه‌كانی فه‌رهه‌نگی ئه‌وان وڵامی شایسته‌ بدرێته‌وه‌ و پێگه‌ی ئاماده‌بوونیان به‌ باشترین خزمه‌تگوزارییه‌كان وه‌ڵام بدرێته‌وه‌.

2 ـ حه‌وت خولی به‌ڕێوه‌چوونی فیستیڤاڵی شانۆی كوردی بۆ خۆی رسته‌یه‌كه‌ كه‌ هه‌میشه‌ له‌ بیر و زه‌ینی هونه‌ری وڵاتدا دووپات ده‌بێته‌وه‌ هه‌تا بڵێت، هونه‌ری شانۆ پێویستی به‌ سه‌رنجدانێكی زیاتر له‌مه‌یه‌. سه‌رنجدانی خزمه‌تگوزاران و به‌رپرسان و به‌رنامه‌دارێژان به‌ میلله‌تێك كه‌ به‌ سه‌بر و رازین. كه‌وایه‌ پێویسته‌ كه‌ كارئاسانی، بوودجه‌كان و بارودۆخێكی كۆمه‌ڵایه‌تی ـ فه‌رهه‌نگی شایسته‌ی ئه‌وان پێك بێت، هه‌تا كاری باشتر ته‌واوكه‌ری وته‌ باشه‌كانی ئێمه‌ بێت.

3 ـ به‌و ئومێده‌ین كه‌ هونه‌رمه‌ندانی به‌رێز له‌ هه‌ڵبژاردن، وه‌رگێڕان و هێنانه‌ سه‌ر شانۆی شانۆگه‌رییه‌كان وردبینی پێویستیان هه‌بێت و لایه‌نه‌كانی نمایشی و شانۆیی، په‌یوه‌ندی گرتن و هه‌روه‌ها خه‌م و كێشه‌كانی سه‌رده‌م و كۆمه‌ڵگای خۆیان به‌ سیما و پێكهاته‌یه‌كی شیاو پێشكه‌ش بكه‌ن.

له‌ حه‌وته‌مین خولی فیستیڤاڵی سه‌رتاسه‌ری شانۆی كوردی وۆركشۆپێكی فێركاری ئه‌كته‌ری له‌ لایه‌ن ئه‌فشین خورشید باخته‌ری و دوو وۆركشۆپی فێركاری شانۆنامه‌نووسی له‌ لایه‌ن حه‌مید ره‌زا نه‌عیمی له‌ هۆڵی كتێبخانه‌ی ناوه‌ندی شاری سه‌قز به‌ڕێوه‌چوو كه‌ پێشوازییه‌كی یه‌كجار باشی لێكرا و هۆگرانی هونه‌ری شانۆ له‌و وۆركشۆپه‌ فێركارییانه‌دا به‌ شێوه‌یه‌كی به‌رچاو به‌شدارییان كرد.

له‌و خوله‌ی فیستیڤاڵه‌كه‌دا 150 هونه‌رمه‌ندی شانۆكار له‌ پارێزگاكانی كوردستان، ئیلام، ئازه‌ربایجانی رۆژئاوا و خۆراسانی باكوور له‌ چوارچێوه‌ی 10 گروپی شانۆییدا له‌ دوو به‌شی كێبڕكێ و لاوه‌كیدا له‌ شاری سه‌قز پێكه‌وه‌ له‌ ركابه‌ری هونه‌ریدا بوون.

له‌م باره‌یه‌وه‌ عیرفان زه‌نگه‌نه‌ به‌رِێوه‌به‌ری كۆمپانیای چوار چرا له‌ شاری هه‌ولێر له‌ لێدوانێكی دا به‌ئاژانسی په‌یامنێری راگه‌یاند " كۆمپانیای چوار چرا بۆ به‌رهه‌م هێنانی هونه‌ری، به‌هاوكاری له‌گه‌ڵ گروپی موزیكی نالی به‌به‌شداری ده‌یان هونه‌رمه‌ندی گۆرانیبێژی به‌هه‌ڵوێستی سه‌رتاسه‌ری كوردستان، هه‌روه‌ها ده‌سته‌یه‌ك له‌ شاعیران و نووسه‌ران و رووناكبیرانی كورد، له‌ هوتێلی چوار چرا له‌ شاری هه‌ولێر كۆبوونه‌وه‌یه‌ك سازده‌كه‌ن، تیادا هه‌ریه‌كه‌و به‌جۆرێك پشتیوانی خۆی بۆ كوردستانی بوونی شاری كه‌ركوك و شاری پێكه‌وه‌ ژیانی خه‌ڵكی ئه‌و شاره‌ ده‌رده‌برِێت".

هه‌روه‌ها زه‌نگه‌نه‌ وتیشی "ئه‌و كۆبوونه‌وه‌یه‌ و سازدانی ئه‌و ئاهه‌نگه‌ بۆ خوێنی ئه‌و شه‌هیدانه‌یه‌ كه‌ له‌خۆپیشاندانی ئازادی و سه‌رفرازی شاری كه‌ركوك گیانی خۆیان كرده‌ خه‌ڵاتی خاكی كوردستان، ئه‌و یاده‌ له‌ئاستێكی باڵا به‌رِێوه‌ ده‌چێت و وه‌ك كۆمپانیای چوار چرا ئاماده‌كاری زۆر باشمان بۆ جێ به‌جێكردووه‌".

به‌رِێوه‌به‌ری كۆمپانیای چوار چرا ناوی به‌شێك له‌و هونه‌رمه‌ندانه‌ی ئاشكرا كرد كه‌ به‌شداری له‌م ئاهه‌نگه‌ ده‌كه‌ن "بۆ به‌رِێوه‌چوونی ئه‌و ئاهه‌نگه‌ چه‌ندین هونه‌رمه‌ندی گۆرانیبێژ بانگهێشت كراون له‌وانه‌ (دیاری قه‌ره‌داغی، حمه‌ ره‌ئوف كه‌ركوكی، سابیر كوردستانی، هاوتا ئه‌سعه‌د، محه‌مه‌د ئه‌حمه‌د ئه‌ربیلی، خه‌سره‌وی ماملێ، سواره‌ محمه‌د، لوقمان سه‌لیم، عه‌باس محه‌مه‌د، ئه‌ژده‌ر وه‌هبی، هۆزان ده‌وێش، كیژان ئیبراهیم خه‌یات، سه‌ڵاح داوده‌، شكور خه‌یات، زانانا جه‌بلی، محمه‌د ته‌ها ئاكره‌یی، گۆران ساڵح، ئاری محه‌مه‌د، سادق هه‌ریری، ئاوات هه‌ورامی، ئێحسان زیرك، سامان عومه‌ر، نازدار)، هه‌روه‌ها چه‌ندین شاعیریش به‌شدارن له‌انه‌ (سه‌ركه‌وت ره‌سوڵ، ئه‌كره‌م ئه‌مین، ئه‌حمه‌د محه‌مه‌د، شاڵاو، كازم كۆیی)".

له‌ كۆتایی دا عیرفان زه‌نگه‌نه‌ وتی "ئومێدم وایه‌ بتوانین به‌زمانی هونه‌ر كارێكی جوان پێش كه‌ش به‌شاری كه‌ركوك بكه‌ین، بۆ ئه‌وه‌ی ببێته‌ هه‌وێنی ئه‌و پاڵپشتیانه‌ی كه‌ بۆ جێ به‌جێكردنی ماده‌ی 140".

له‌م باره‌‌یه‌وه‌ هونه‌رمه‌ندی سینه‌ماكاری كورد ره‌حیم زه‌بیحی له‌ دیدارێكی تایبه‌ت بۆ ئاژانسی هه‌واڵ و به‌دواداچوونی كوردستان ـ په‌یامنێر ـ به‌ر له‌ سه‌فه‌ره‌كه‌ی بۆ وڵاتی سویسرا بۆ به‌شداری كردن له‌ فیستیڤاڵی فیلمی لوكارنۆ سه‌باره‌ت به‌م فیستیڤاڵه‌ گوتی: "شه‌ست و یه‌كه‌مین خولی فیستیڤاڵی نێونه‌ته‌وه‌یی فیلمی "لوكارنۆ" له‌ رۆژانی 6 تا 16ی ئۆگۆستی 2008 رێكه‌وتی 16 تا 26ی گه‌لاوێژی 1387 له‌ شاری لوكارنۆ له‌ وڵاتی سویسرا به‌ڕێوه‌ده‌چێت. فیلمی بڵندی سینه‌مایی "وڵاتی ئه‌فسانه‌" ته‌نیا نوێنه‌ری سینه‌مای ئێرانه‌ له‌م رووداوه‌ گرینگه‌ نێونه‌ته‌وه‌ییه‌دا و له‌ به‌شی كێبڕكێی "سینه‌ماكارانی ئێستا" له‌م فیستیڤاڵه‌دا ركابه‌ری ده‌كا و 3 جار نمایش ده‌كرێت".

هه‌روه‌ها سه‌بارت به‌ به‌شداربوونی فیلمی سینه‌مایی "وڵاتی ئه‌فسانه‌" له‌م فیستیڤاڵه‌ گوتی: "فیستیڤاڵی لوكارنۆ له‌ رۆژی چوارشه‌ممه‌ 6ی ئۆگۆست (16ی گه‌لاوێژ) به‌ یه‌كه‌مین نمایشی ئه‌وروپی فیلمێكی به‌ریتانی به‌ ناوی "دیداری دووباره‌ی برایدشید" له‌ ده‌رهێنانی "جۆلین جارۆڵد" له‌ هۆڵی پیاتزا گرانده‌ له‌ شاری لوكارنۆی سویسرا كاره‌كانی خۆی ده‌ست ده‌كات. فیستیڤاڵی لوكارنۆ رۆژی هه‌ینی 8ی ئۆگۆست كاتژمێر 30/18ی ئێواره‌ (18ی گه‌لاوێژی 1387)، یه‌كه‌مین به‌رنامه‌ی نمایشكردنی فیلمی "وڵاتی ئه‌فسانه‌" له‌ به‌شی كێبڕكێی نێونه‌ته‌وه‌یی "سینه‌ماكارانی ئێستا" به‌ڕێوه‌ ده‌بات."

زه‌بیحی هه‌روه‌ها سه‌باره‌ت به‌ نمایشه‌كانی دیكه‌ی "وڵاتی ئه‌فسانه‌" كه‌ دوایین به‌رهه‌مییه‌تی به‌ ئاژانسی هه‌واڵی په‌‌یامنێری راگه‌یاند: "وڵاتی ئه‌فسانه‌ سێ نمایشی دیكه‌ی له‌ پێشدایه‌ كه‌ له‌ رۆژی شه‌ممه‌ 9ی ئۆگۆست كاتژمێر 9ی شه‌و (19ی گه‌لاوێژی 1387)، و له‌ رۆژی یه‌كشه‌ممه‌ 10ی ئۆگۆست كاتژمێر 15/16ی عه‌سر (20ی گه‌لاوێژی
1387)، فیلمه‌كه‌ له‌م فیستیڤاڵه‌دا نمایش ده‌كرێت."

زه‌بیحی هه‌روه‌ها گوتی: "فیلمی وڵاتی ئه‌فسانه‌ به‌رهه‌می هاوبه‌شی دوو وڵاتی ئێران و ئه‌ڵمانیا و درامایه‌كه‌ سه‌باره‌ت به‌ مرۆڤه‌كانی پاش شه‌ڕ. هه‌روه‌ها بابه‌ت و سووژه‌ی سه‌ره‌كی ئه‌م فیلمه‌ كاریگه‌ریی شه‌ڕ له‌ سه‌ر ژیانی مرۆڤه‌كانه‌ و شێواز و چۆنییه‌تی ئه‌و گۆڕانكارییه‌ی كه‌ شه‌ڕ له‌ سه‌ر ئه‌وان به‌دی دێنێت."

هونه‌رمه‌ندی سینه‌ماكار ره‌حیم زه‌بیحی له‌ كۆتایی ئه‌م دیداره‌دا گوتی: "شه‌ست و یه‌كه‌مین خولی فیستیڤاڵی نێونه‌ته‌وه‌یی فیلمی "لوكارنۆ" تا رۆژی 16ی ئۆگۆستی 2008 رێكه‌وتی 26ی گه‌لاوێژی 1387 له‌ وڵاتی سویسرا درێژه‌ به‌ كاره‌كانی ده‌دات، كه‌ خۆشم تیایدا ئاماده‌ ده‌بم."

هونه‌رمه‌ندان و ستافی ئاماده‌كردنی پرۆژه‌ی فیلمی سینه‌مایی "وڵاتی افسانه‌" بریتین له‌:
نووسه‌ر، ده‌رهێنه‌ر و به‌رهه‌مهێنه‌ر: ره‌حیم زه‌بیحی.
وێنه‌گر: ئه‌میر عه‌لی وه‌یسی.
به‌ڕێوه‌به‌ری ته‌ولید: حه‌سه‌ن ئه‌سڵانی.
مۆنتاژ: هیوا زه‌بیحی.
دیزاینی ده‌نگ و ده‌نگهه‌ڵگر: حوسێن قورچیان.
ئه‌كته‌ره‌كان: كه‌یوان زه‌بیحی، شه‌وبۆ سوله‌یمانی، محه‌مه‌د ساڵح سووزه‌نی،
ره‌حیم تاژانی، مه‌هتاب حه‌سه‌نی، عه‌بدوڵڵا محه‌مه‌دی، عه‌لی مه‌جید زاده‌، به‌هاره‌ عه‌بدوڵڵا نیژاد، فریاد فه‌تحوڵڵاهی، ره‌حمان محه‌مه‌د زاده‌ و كیمیا قه‌وامی.

چیرۆكی فیلمی "وڵاتی ئه‌فسانه‌" سه‌باره‌ت به‌ قوربانیانی جه‌نگه‌. له‌ دوای رووخانی
رژێمی به‌عس و ده‌ست به‌سه‌ركردنی سه‌دام و سه‌ركرده‌كانی رژێمی به‌عس و دادگایی كردنی سه‌رانی ئه‌و رژێمه‌، یه‌كێك له‌ قوربانی ئه‌و جه‌نگه‌ داسه‌پاوه‌ به‌ سه‌ر وڵاتی ئێراندا له‌ شاره‌كانی كوردستانی سكاڵانامه‌یه‌ك دژ به‌ تاوانباران و سه‌ركرده‌كانی ئه‌و رژێمه‌ ئاماده‌ ده‌كات و بۆ ئه‌م مه‌به‌سته‌ش به‌ هه‌موو كه‌م ئه‌ندامان و بریندارانی چه‌كه‌ كیمیاییه‌كان و قوربانیانی سه‌رده‌می شه‌ڕی 8 ساڵه‌ی ئێران و عێراق ئیمزای ده‌كات. دواتر هه‌وڵ ده‌دات ده‌قی سكاڵانامه‌كه‌ به‌ دادگای باڵای پێداچوونه‌وه‌ی تایبه‌ت به‌ لێكۆڵینه‌وه‌ی تاوانه‌كانی شه‌ڕی ئه‌م تاوانبارانه‌ له‌ شاری به‌غدا بگه‌یه‌نێت، ئه‌و به‌ره‌و وڵاتی عێراق به‌رێده‌كه‌وێت، به‌ڵام له‌ وڵاتی ئه‌فسانه‌دا ... .

هونه‌رمه‌ندی سینه‌ماكار ره‌حیم زه‌بیحی ساڵی 1971 رێكه‌وتی (1350) له‌ شاری بانه‌ له‌ كوردستانی ئێران هاتۆته‌ دنیا. ماوه‌ی 16 ساڵ به‌رده‌وام له‌ بواری هونه‌ری شانۆگه‌ری وه‌كوو ده‌رهێنه‌ر و نووسه‌ری ده‌قی شانۆنامه‌ و هه‌روه‌ها رۆڵ بینین چالاكی كردووه‌ و له‌ فیستیڤاڵه‌كانی شانۆی كوردستان و ئێران به‌شداری كردووه‌ و چه‌ندین خه‌ڵاتی به‌ده‌ستهێناوه‌.

دواتر خولێكی یه‌ك ساڵه‌ی هونه‌ری سینه‌ما له‌ ئه‌نجومه‌نی سینه‌مای لاوانی ئێران ته‌واو كرد. له‌ ساڵی 2002 رێكه‌وتی (1381) یه‌كه‌مین كورته‌ فیلمی خۆی به‌ ناوی "هاوار" ساز كرد كه‌ له‌ فیستیڤاڵه‌كانی ناوخۆیی و بیانیدا توانی سه‌رنجی پسپۆران و خاوه‌نڕایانی بواری سینه‌ما بۆ لای خۆی رابكێشێت. فیلمی "هاوار" له‌ فیستیڤاڵه‌كانی كورته‌ فیلمی تاران، سۆنی، ئیسفه‌هان، وارش، باران، كولرمۆند فراند له‌ فه‌ره‌نسا، هامبۆرگ له‌ ئه‌ڵمانیا، ساوپاولۆ له‌ به‌ڕازیل و له‌ چه‌ندین فیستیڤاڵی سینه‌مایی دیكه‌ به‌شدارییه‌كی دره‌وشاوه‌ و سه‌ركه‌وتووانه‌ی بوو، هه‌روه‌ها له‌ فیستیڤاڵی كولرمۆند فراند له‌ وڵاتی فه‌ره‌نسا كاندید واته‌ ناوزه‌دی باشترین فیلم بوو.

زه‌بیحی له‌ دوای فیلمی هاوار كاری ده‌رهێنان و به‌رهه‌مهێنانی چه‌ندین كورته‌ فیلمی به‌ ناوه‌كانی "سه‌ته‌لایت" ، "گوریز" ، "كۆتایی جه‌نگ" ، "ئه‌و پیاوه‌ی چوو بۆ سه‌یران" ،
"ژانی دابڕانی ئه‌به‌دی" ، "ساته‌ مه‌زادكراوه‌كان" ، "تیرۆریستێك داده‌به‌زێت" ، "رۆژی
دوایی" ، "ئیسترێس" و "سه‌مای ره‌نگه‌كان" ئه‌نجامداوه‌ كه‌ هه‌موویان له‌ زۆربه‌ی
فیستیڤاڵه‌ جۆراوجۆره‌كانی بیانی و ناوخۆییدا به‌شدارییه‌كی به‌رچاویان هه‌بوو.

هونه‌رمه‌ند ره‌حیم زه‌بیحی وه‌كوو سینه‌ماكارێكی سه‌ربه‌خۆ له‌ شاری سه‌رسنووری بانه‌ خه‌ریكی چالاكی له‌ بواری سینه‌مایه‌، بابه‌ته‌كانی فیلمه‌كانی ئه‌و توندوتیژی له‌ دژی ئافره‌تان و منداڵان و قوربانیانی جه‌نگه‌. وه‌رگرتنی چه‌ندین دیپلۆمای شانازی له‌ ده‌ستی سینه‌ماكارانی گه‌وره‌ و ناوداری وڵاتی ئێران و وه‌رگرتنی چه‌ندین خه‌ڵات له‌ فیستیڤاڵه‌كانی بیانی له‌ به‌ر دروست كردنی فیلم و به‌رهه‌مه‌كانی له‌ كارنامه‌ی كاریی
ئه‌م سینه‌ماكاره‌ لاوه‌دا نیشانه‌ی توانایی باڵای ئه‌وه‌ له‌ سازكردنی فیلمدا.

زه‌بیحی هه‌موو جارێك گوتوویه‌تی خه‌مێكی مرۆڤانه‌ منی كرده‌ سینه‌ماكار و دوایین به‌رهه‌می ئه‌م هونه‌رمه‌نده‌ فیلمی بڵندی دیكۆمێنتی "ئه‌م كاته‌ت باش سینه‌مای كوردی" كه‌ سه‌باره‌ت به‌ دوێنێ و ئه‌مرۆ و ئاینده‌ی سینه‌مای كوردییه‌.

 له‌ شاری تاران، پێشانگای وێنه‌ی فۆتۆگرافی وێنه‌گری لاوی ئێرانی قادر عاقڵی كه‌ تایبه‌ت به‌ بریندارانی بۆردومانی كیمیایی شاری سه‌رده‌شته‌، به‌ ناونیشانی "سه‌رده‌شت" له‌ گه‌له‌ری ماڵی وێنه‌گرانی حه‌وزه‌ی هونه‌ری له‌ شاری تاران به‌ڕێوه‌چوو.

له‌م پیشانگایه‌دا كه‌ بۆ ماوه‌ی 6 رۆژ به‌رده‌وام بوو، 35 وێنه‌ی فۆتۆگرافی بریندارانی بۆردومانی كیمیایی "سه‌رده‌شت" له‌ گه‌له‌ری ماڵی وێنه‌گرانی حه‌وزه‌ی هونه‌ری له‌ شاری تاران نمایش كرا، كه‌ له‌ لایه‌ن وێنه‌گری لاوی ئێرانی قادر عاقڵی به‌ كامێراكه‌ی له‌ شاری سه‌رده‌شت گیراون.

له‌ ته‌نیشت پێشانگای وێنه‌ی فۆتۆگرافی بریندارانی بۆردومانی كیمیایی شاری سه‌رده‌شت، فیلمێك به‌ شێوه‌ی ڤیدیۆئارت نمایش كرا كه‌ به‌ پێی راپۆڕتێك له‌ فیلمه‌كانی دیكه‌ی ئه‌م هونه‌رمه‌نده‌ له‌ ناوچه‌ی سه‌ردشت ساز كراوه‌.

وێنه‌كانی فۆتۆگرافی پێشانگای بریندارانی بۆردومانی كیمیایی شاری سه‌رده‌شت، گێڕانه‌وه‌یه‌كه‌یه‌كی زۆر بێوێنه‌یه‌ له‌ بریندارانی كاره‌ساتی بۆردومانی كیمیایی شاری سه‌رده‌شت و كاردانه‌وه‌ی ئه‌و ژه‌هره‌ له‌سه‌ر ئه‌و بریندارانه‌ و منداڵه‌كانیان و هه‌روه‌ها نه‌وه‌كانی دوای ئه‌وان. كه‌ هونه‌رمه‌ندی وێنه‌گر قادر عاقڵی به‌ شێوه‌یه‌كی دڵسۆزانه‌ و به‌ خۆماندوویی كردن ئه‌م كۆمه‌ڵه‌ وێنه‌یه‌ی بۆ ئه‌رشیڤی كورد گرتووه‌.

جێی ئاماژه‌ بۆكردنه‌ هونه‌رمه‌ندی وێنه‌گری ئێرانی قادر عاقڵی ساڵی 2000 ده‌ستی به‌ كاری وێنه‌گری فۆتۆگرافی كردووه‌، ئێستا وێنه‌گری ئاژانسی هه‌واڵنێری فارسه‌ له‌ ئێران و یه‌كێكه‌ له‌ وێنه‌گره‌ به‌تواناكانی به‌شی وێنه‌گری هه‌واڵ

له‌م به‌رنامه‌ی شاخه‌وانییه‌دا به‌شداری بۆ هه‌موان ئازاده‌و هۆگران ده‌توانن له‌ كاتژمێر 6ی به‌یانی سه‌به‌ی چوارشه‌ممه‌ 25ی جوونی 2008 (5ی پووشپه‌ڕی 1387) له‌ شوێنی كۆبوونه‌وه‌ واته‌ به‌ر ده‌رگای زانكۆی عولوومی پایه‌ له‌ زانكۆی بووعه‌لی سینای شاری هه‌مه‌دان ئاماده‌بن.

ئه‌م به‌رنامه‌ی شاخه‌وانییه‌ له‌ ژێر ناونیشانی "دایه‌ ماڵئاوا به‌ره‌و تێكۆشان" به‌ به‌شداری شاخه‌وانانی كورد و خوێندكارانی زانكۆكانی ئێران و هۆگرانی وه‌رزشی شاخه‌وانی به‌ڕێوه‌ده‌چێت و تێكڕا به‌ره‌و شاخی ئه‌لوه‌ند سه‌رده‌كه‌ون.

هه‌روه‌ها له‌ میانه‌ی ئه‌م رێوڕه‌سمه‌دا مۆسیقای خۆماڵی كوردستان پێشكه‌ش ده‌كرێت

دیدلی له‌ ویلایه‌تی میسیسبی له‌ دایكبووه‌، له‌گه‌ڵ خێزانه‌كه‌ی له‌ ته‌مه‌نی 7 ساڵیدا چۆته‌ شیكاگۆ، له‌وێ وه‌كو دارتاش و فیته‌ری ئۆتۆمبێل كاری كرد و دواتر به‌ره‌و دنیای هونه‌ری موزیك چوو و بوو به‌ یه‌كێك له‌ هونه‌رمه‌ندانی ناودارانی ئه‌و بواره‌.

دیدلی سه‌ره‌تا له‌ ستایلی موزیكی "بلۆز" كاری ده‌كرد و دواتر به‌ره‌و ستایلی "رۆك" چوو و توانی خه‌ڵاتی گرامی له‌ساڵی 1999 بده‌ستبێنێت و له‌به‌رده‌م دوو سه‌رۆكی ئه‌مه‌ریكا ئامێری گیتاری ژه‌نیووه‌، ئه‌وانیش جۆرج بۆشی باوك و بیل كلینتۆن بوون.

دیدلی جگه‌ له‌ ژه‌نینی ئامێری گیتاره‌كه‌ چه‌ندین ئه‌لبومی گۆرانیشی بڵاوكردۆته‌وه‌، یه‌كه‌م ئه‌لبومیشی له‌ساڵی 1955 بڵاوكرده‌وه‌ و دیارترین گۆرانییه‌كانیش كه‌ ده‌نگدانه‌وه‌ی زۆری هه‌بوو، ئه‌مانه‌ن: "You can't"، "Judge a book by its cover"، "Who do you love".

بۆ بینین به‌رهه‌مه‌كانی هونه‌رمه‌ند ئه‌و لینكه‌ كلیك بكه‌.

http://www.youtube.com/watch?v=IEfz9VfFOKQ&feature=related

ئه‌م فیلمه‌ باس له‌ هه‌ستی پێشمه‌رگه‌ ده‌كات به‌رامبه‌ر ئه‌وانه‌ی ده‌كه‌ونه‌ به‌رده‌ستیان و به‌تایبه‌ت به‌زیی هاتنه‌وه‌یان به‌منداڵێكدا له‌كاتی پرۆسه‌ی رزگاركردنی عێراقدا، ئه‌مه‌ ده‌بێته‌ ناوه‌رۆكی فیلمه‌كه‌ و له‌ریگه‌ی نمایشه‌وه‌ ئاراسته‌ی جیهانی ده‌كات.

فیلمی بڵندی سینه‌مایی كوردی "په‌رینه‌وه‌ له‌غوبار" له‌ده‌هێنانی ده‌رهێنه‌ر شه‌وكه‌ت ئه‌مین كوركی و له‌ وێنه‌گرتنی توره‌ج ئه‌سلانی و مۆنتاژكردنی ئیبراهیم سه‌عیدی و به‌به‌شداری چه‌ند هونه‌رمه‌ندیك به‌رهه‌م هێنراوه‌.

جێگه‌ی ئاماژه‌ بۆ كردنه‌ كه‌ ئه‌م فیلمه‌ له‌ 30 فێستڤاڵی جیهانییدا نمایشكراوه‌، هاوكات 10 خه‌ڵاتی له‌ ولاَته‌كانی ئیسپانیا و عومان و هیندستان و به‌لژیكا و چه‌ند ولاَتێكی دیكه‌ به‌ده‌ستهێناوه‌.

كورته‌ فیلمی كارتۆنی (ئه‌نیمه‌یشنی)جۆرێكیتر له‌ بوون له‌ فیستیڤاڵی ئێنسی نمایش ده‌كرێت                     

 هاوري
كورته‌ فیلمی كارتۆنی "جۆرێكی تر بوون" Being different له‌ ده‌رهێنانی هونه‌رمه‌ندی شێوه‌كاری كورد ماشه‌ڵڵا محه‌مه‌دی  هونه‌رمه‌ندی سنه‌یی و به‌ ده‌نگی گۆرانیبێژی ناوداری كورد جوان حاجۆ به‌شداری له‌ به‌شی كێبڕكێی فیستیڤاڵی نێونه‌ته‌وه‌یی فیلمی كارتۆنی "ئێنسی" ساڵی 2008 له‌ وڵاتی فه‌ره‌نسا ده‌كات.

 كورته‌ فیلمی ئه‌نیمه‌یشنی (كارتۆنی) "جور دیگر بودن" واته‌ "جۆرێكی تر بوون" Being different له‌ ده‌رهێنانی هونه‌رمه‌ندی سنه‌یی ماشه‌ڵڵا محه‌مه‌دی و به‌ كه‌ڵك وه‌رگرتن له‌ ده‌نگی به‌ جوان حاجۆ، له‌ به‌شی كێبڕكێی فیستیڤاڵی نێونه‌ته‌وه‌یی فیلمی كارتۆنی "ئێنسی" ساڵی 2008 له‌ وڵاتی فه‌ره‌نسا نمایش ده‌كرێت و له‌گه‌ڵ 40 به‌رهه‌می كارتۆنی دیكه‌ له‌ سینه‌ماكارانی سه‌رانسه‌ری دنیا بۆ وه‌رگرتنی خه‌ڵاتی فیستیڤاڵ، له‌ ركابه‌ریدا ده‌بێت.

فیستیڤاڵی نێونه‌ته‌وه‌یی فیلمی كارتۆنی "ئێنسی" یه‌كێكه‌ له‌ فیستیڤاڵه‌ گرنگ و پربایخه‌كانی سینه‌مای كارتۆنی دنیا كه‌ هه‌موو ساڵێك به‌ به‌شداری به‌رهه‌می سینه‌ماكارنی سه‌رانسه‌ری جیهان له‌ مانگی مای له‌ وڵاتی فه‌ره‌نسا به‌ڕێوه‌ده‌چێت

هونه‌رمه‌ندی شێوه‌كاری كورد ماشه‌ڵڵا محه‌مه‌دی له‌ په‌یوه‌نیدكدا له‌گه‌ڵ هونه‌رنما وتی "ئه‌م فیلمه‌ به‌ شێوه‌ی كارتۆنی و له‌ دوایین رۆژه‌كانی ساڵی 2004 له‌ شاری سنه‌ ساز كراوه‌ و بۆ یه‌كه‌م جار ساڵی 2005 له‌ فیستیڤاڵی فیلمی 100 خوله‌كی له‌ شاری كه‌ره‌ج نمایش كرا و توانی خه‌ڵاتی سه‌ره‌كی ئه‌م فیستیڤاڵه‌ به‌ده‌ستبێنێت. هه‌روه‌ها ساڵی 2005 له‌ فیستیڤاڵی "زه‌یتوونی" ئێران خه‌ڵاتی دووه‌می به‌ده‌ستهێنا."

هه‌روه‌ها گوتی: "فیلمی كارتۆنی "جۆرێكی تر بوون" Being different ساڵی 2006 له‌ به‌شی به‌رهه‌مه‌ كارتۆنییه‌كانی كێبڕكێی سینه‌مای نه‌ته‌وه‌یی و روانینی نه‌ته‌وه‌یی له‌ 23مین خولی فیستیڤاڵی نه‌ته‌وه‌یی و 11مین خولی فیستیڤاڵی نێونه‌ته‌وه‌یی فیستیڤاڵی كورته‌ فیلمی تاران نمایش كرا."

محه‌مه‌دی هه‌روه‌ها رایگه‌یاند: "ئه‌م فیلمه‌ له‌ درێژه‌دا له‌ چه‌ندین فیستیڤاڵی نێونه‌ته‌وه‌یی به‌شداری كردووه‌، له‌وانه‌: فیستیڤاڵی "میدیا ئارت" له‌ وڵاتی ئه‌ڵمانیا، فیستیڤاڵی "ئه‌نیما" له‌ شاری مه‌درید له‌ وڵاتی ئیسپانیا، فیستیڤاڵی "بارسلۆن" له‌ وڵاتی ئیسپانی، فیستیڤاڵی "كراكۆف" له‌ وڵاتی له‌هیستان، فیستیڤاڵی "ساناتۆ" له‌ وڵاتی ئیتالیا، فیستیڤاڵی "سیكاف" له‌ وڵاتی كۆریای باشوور و هه‌روه‌ها له‌ فیستیڤاڵی "یه‌ك خوله‌ك"ی سویسرا."

هونه‌رمه‌ند سه‌باره‌ت به‌ سیناریۆی كورته‌ فیلمی "جۆرێكی تر بوون" گوتی: "سیناریۆی ئه‌م فیلمه‌ له‌ لایه‌ن كوره‌كه‌م به‌ ناوی سیامه‌ند محه‌مه‌دی نووسراوه‌، چیرۆكی پیاوێكه‌ كه‌ ده‌كوژرێت و خوێنه‌كه‌ی ده‌بێته‌ ماسی سوور، بابه‌تی ئه‌م سیناریۆ بۆ من زۆر سه‌رنج راكێش بوو، چونكه‌ پێشتر بینیبووان كه‌سێك كه‌ ده‌كوژرێت خوێنه‌كه‌ی ده‌بێت به‌ گوڵ و چه‌ندین شتی دیكه‌، به‌ڵام له‌وه‌دا بینیم كه‌ خوێنه‌كه‌ ده‌بێت به‌ ماسی سوور، كه‌ ئه‌وه‌ بۆ من زۆر تازه‌ بوو."

سینه‌ماكاری كورد ماشه‌ڵڵا محه‌مه‌دی له‌ كۆتایی ئه‌م دیداره‌دا وتی: "ماسی نیشانه‌ی ساڵی نوێیه‌، تازه‌ بوونه‌ و بۆخۆی جوانیه‌كی تێدایه‌ و زۆریش نزێك به‌ خوێنه‌ و به‌شێوه‌یه‌كی زۆر جوانتر، كه‌ گۆڕانكارییه‌كی زۆر جوان بوو بۆ من. له‌ فیستیڤاڵه‌كان زۆریان حه‌ز به‌م فیلم و سیناریۆیه‌ كردووه‌ و پێشوازیان لێكردووه‌."

هونه‌رمه‌ندانی به‌شداربوو له‌ كورته‌ فیلمی "جۆرێكی تر بوون" بریتین له‌:
ده‌رهێنه‌ر، ئێنیماتۆر، وێنه‌گر، ده‌نگ، مونتاژ، به‌رهه‌مهێنه‌ر: ماشه‌ڵڵا محه‌مه‌دی.
نووسه‌ری سیناریۆ: سیامه‌ند محه‌مه‌دی.
موزیك: جوان حاجۆ.
ماوه‌: 1 خوله‌ك و 20 چركه‌.
به‌رهه‌می: ساڵی 2006/ 1385.

سه‌یوان سه‌عیدیان هونه‌رمه‌ندی شێوه‌كار و دیزاینه‌ری رۆژهه‌ڵاتی كوردستان ئێستا خه‌ریكی خۆ ئاماده‌كرنه‌ بۆ پرژه‌ی نوێی خۆی كه‌ كارێكی پێرفۆرمانسه‌ و وه‌ك نامه‌ی ده‌رچوونی له‌ كۆلێژی هونه‌ره‌ جوانه‌كانی سلێمانی ئاماده‌ی كردووه‌ و رۆژی سێشه‌ممه‌ (3/6) هه‌ر له‌ به‌رده‌رگای زانكۆی سلێمانی به‌رِێوه‌ده‌چێت، هونه‌رمه‌ند ده‌رباره‌ی ئه‌م پرۆژه‌یه‌ ئاماژه‌ی به‌وه‌كرد "ئه‌م پرۆژه‌یه‌ هی ئه‌تروحه‌كه‌مه‌وه‌ واتا كارنامه‌ی كۆتایی خوێندنه‌كه‌م له‌ كۆلێژی هونه‌ره‌ جوانه‌كانی زانكۆی  سلێمانی، كه‌ باس له‌ دیارده‌ی سواڵكه‌ری ده‌كات وه‌ك چه‌مكێكی گشتی".

هه‌روه‌ها ئه‌وه‌شی راگه‌یاند كه‌ له‌ ساڵی 2004 خه‌ریكی ئه‌م پرۆژه‌یه‌ بووه‌ و گوتی "ئێستا توانیم ئه‌و پرۆژه‌یه‌ بهێنمه‌ بواری پراكتیك كه‌ له‌به‌رده‌م زانكۆی سلێمانی به‌رِێوه‌ده‌چێت".
 
ده‌رباره‌ی ناوه‌رِۆكی ئه‌م پرۆژه‌یه‌ سه‌عدیان  به هونه رنمای وت "سێ سواڵكه‌ری راسته‌قینه‌ و چوار ئه‌كته‌ر له‌م پرۆژه‌یه‌ به‌شدارن، ئه‌م چوار ئه‌كته‌ره‌ به‌ جلوبه‌رگی جوانه‌وه‌ رۆڵ ده‌بینن و سواڵكه‌ركانیش منداڵ و گه‌نج و پیرن و بۆ هه‌ریه‌ك له‌و كه‌سانه‌ چوارچێوه‌یه‌كی بۆ دانراوه‌ كه‌ له‌سه‌ری ده‌وستێت و له‌ دار دروستكراوه‌ و به‌ پاره‌ی 250 و 500 دیناری عێراقی داپۆشراوه‌".

هه‌روه‌ها ئه‌وه‌شی ئاشكرا كرد "ئه‌م پرۆژه‌ هونه‌رییه‌ كارێكی ره‌خنه‌گرانه‌یه‌ و پێم وایه‌ نیوه‌ی كۆمه‌ڵگامان سواڵكه‌ره‌ به‌تایبه‌ت گه‌نجه‌كانمان كه‌ هه‌ریه‌كه‌و به‌ جۆرك سواڵ ده‌كات".

هه‌ر ده‌رباره‌ی ئه‌م پرۆژه‌ ره‌خنه‌ییه‌ سه‌یوان سه‌عدیان رایگه‌یاند "له‌ ئاستێكی دیكه‌دا خودی حكومه‌تیش سواڵكه‌ره‌ كه‌ ناتوانێت سه‌رتایه‌ترین شته‌كانمان بۆ دابین بكات، ته‌ماته‌ و خیار و تا دروستكردنی په‌رداخی ئاومان له‌ ده‌ره‌وه‌ بۆ دێنێت، له‌ كاتێك كه‌ حكومه‌ت نه‌توانێت ئه‌م شتانه‌ به‌رهه‌م بێنێت و چاوی له‌ ده‌ره‌وه‌ بێت، ئه‌وه‌ خودی خۆی سواڵكه‌ره‌".

ده‌رباره‌ی ئه‌و ستایله‌ی كه‌ له‌و پرۆژه‌ هونه‌رییه‌دا كاری له‌سه‌ر ده‌كات، هونه‌رمه‌ندی دیزاینه‌ر گوتی "وه‌كو ستایلی خۆم ئه‌مه‌ بۆ یه‌كه‌مجاره‌ ئه‌م كاره‌ ده‌كه‌م و به‌شێوه‌یه‌كی پێرفۆرمانسه‌ ده‌یخه‌مه‌ سه‌رشه‌قام".

ده‌رباره‌ی ئه‌وه‌ی كه‌ ئه‌م پرۆژه‌یه‌ پێشتر كاری له‌سه‌ر كرابێت ئاماژه‌ی به‌وه‌كرد "نه‌م زانیووه‌ تا ئێستا له‌ كوردستان شتێكی له‌م جۆره‌ كرابێت، به‌ڵام له‌گه‌ڵ ئه‌وش ناتوانم برِیار بده‌م كه‌ ئایا كراوه‌ یان نه‌كراوه‌".

 كاتژمێر 7ی ئێواره‌ی دوێنێ یه‌كشه‌ممه‌ فیلمی سینه‌مایی "ژانی گه‌ل" له‌ ده‌رهێنانی "جه‌میل رۆسته‌می" به‌ ئاماده‌بوونی چه‌ندین كه‌سایه‌تی ناوداری سیاسی و فه‌رهه‌نگی و هونه‌ری كوردستان و ئێران و هه‌روه‌ها ژماره‌یه‌كی زۆر له‌ كورده‌كانی دانیشتووی تاران و بینه‌رانی هونه‌ری سینه‌ما له‌ هۆڵی ژماره‌ یه‌كی سینه‌ما فلستین له‌ شاری تاران نمایش كرا،

له‌وانه‌: نوێنه‌ری حكومه‌تی هه‌رێمی كوردستان له‌ وڵاتی ئێران نازم عومه‌ر ده‌باغ، نوێنه‌ری پارتی دیمۆكراتی كوردستانی عێراق له‌ شاری تاران دكتور شه‌وكه‌ت بامه‌ڕنی، سه‌رۆكی كورده‌كانی دانیشتووی تاران دكتور ئه‌سعه‌د ئه‌رده‌ڵان، سینه‌ماكار جه‌میل رۆسته‌می، به‌هرام وه‌له‌دبه‌یگی سه‌رۆكی ئه‌نستیتۆی كوردستان له‌ تاران، به‌رۆژ ئاكره‌یی شاعیر و نووسه‌ر، هه‌ندێك له‌ رۆژنامه‌نووسانی گه‌نجی كوردستان، گۆرانیبێژی نوێخوازی كورد مسته‌فا مه‌حمودی، فه‌رشید غه‌ریب نیژاد سه‌رپه‌ڕشتی گروپی موزیكی چل ده‌ف، هه‌ندێك له‌ ستافی ته‌كنیكی و ئاماده‌ كردنی فیلمی سینه‌مایی "ژانی گه‌ل"، ژماره‌یه‌ك له‌ سینه‌ماكاره‌ لاوه‌كانی كوردستان، ژماره‌یه‌كی زۆر له‌ كورده‌كانی دانیشتووی تاران و هه‌روه‌ها ژماره‌یه‌كی یه‌گجار زۆر له‌ خه‌ڵكی تاران.

فیلمی سینه‌مایی "ژانی گه‌ل" ساڵی پار ته‌نیا جارێك بۆ لێژنه‌ی هه‌ڵسه‌نگاندنی فیلمه‌ بڵنده‌كانی 11مین خولی جه‌ژنی ماڵی سینه‌مای ئێران له‌ شاری تاران نمایش كرابوو، كه‌ ئاوازدانه‌ری ناوداری موزیكی فیلمی ئێران كارێن هۆمایوونفه‌ر بۆ ئاماده‌كردنی موزیكی ئه‌م فیلمه‌ له‌ گه‌ڵ 4 فیلمی دیكه‌ بۆ وه‌رگرتنی ته‌ندیس و دیپڵۆمای شانازی ناوزه‌د كرابوو، كه‌ له‌ كۆتاییدا توانی ئه‌م پله‌یه‌ به‌سه‌ركه‌وتووییه‌وه‌ به‌ده‌ستبێنێت. 

به‌پێی هه‌واڵێكی ئاژانسی فرانس پرێس، به‌نمایشكردنی فیلمی به‌رازیلی "بلایندنس" واته‌ "كوێر"ی ده‌رهێنه‌ری به‌رازیلی فرناندو میریلس، فیستیڤاڵی سینه‌مایی كان ده‌ست بیده‌كات، كه‌ چیروكی ئه‌م فیلمه‌ چیركێكی فه‌لسه‌فییه‌ و له‌ رۆمانێكی رۆمانووسی پورتوگالی جوزیه‌ ساراماگوا وه‌رگیراوه‌.

ئه‌و كه‌سانه‌ی كه‌ ه‌ رۆژی یه‌كه‌م له‌سه‌ر رایه‌خی سووری فیستیڤاڵ تێده‌په‌رِێن، ئه‌م ئه‌كته‌رانه‌ن (جولیان مور، مارك روفالو، دانی گولفه‌ر و گایل گارسیا برنال).

جێگه‌ی ئاماژه‌ بۆ كردنه‌ كه‌ چه‌ند فیلمێك بۆ به‌ده‌ستهێنانی خه‌ڵاتی چڵه‌ خورمای زێرِین ده‌كه‌ونه‌ پێشبرِكێ.

روژی شه‌ممه‌ كاتژمێر 7ی ئێواره‌ی  و به‌هاوكاری هونه‌رمه‌ندانی موزیكی سلێمانی كۆنسێرتی خانمه‌ هونه‌رمه‌ند شه‌هێن تاڵه‌بانی له‌هۆڵی رۆشنبیری سلێمانی به‌رێوه‌چوو.

له‌كۆنسێرته‌كه‌دا كه‌ ژماره‌یه‌كی زۆر له‌گوێگرانی ده‌نگی ئه‌و هونه‌رمه‌نده‌ ئاماده‌ی بوون، چه‌ندین گۆرانی و مه‌قام له‌لایه‌ن هونه‌رمه‌ند شه‌هێن تاڵه‌بانی پێشكه‌شكرا، كه‌ پێكهاته‌ی ته‌واوی به‌رهه‌مه‌كانی خۆیی و چه‌ند گۆرانییه‌كی دیكه‌شی تێدابوو.

له‌لێدوانێكیدا  شه‌هێن تاڵه‌بانی ئاماژه‌ی به‌وه‌دا كه‌ خۆشترین ساته‌كانی ژیانی ئه‌و ساتانه‌یه‌ كه‌ له‌ كوردستاندایه‌ و گه‌رموگوری هه‌وادارانی ده‌نگیشی ئه‌وه‌نده‌ی دیكه‌ كوردستانی لا خۆشه‌ویست ده‌كات.

به‌ پێی راپۆڕتی به‌شی هونه‌ری ئاژانسی هه‌واڵی په‌یامنێر له‌ شاری تاران، 18مین خولی فیستیڤاڵی ساڵانه‌ی فیلمه‌ ئێرانییه‌كان له‌ زانكۆی UCLAی لۆس ئه‌نجلێس له‌ وڵاتی ئه‌مه‌ریكا به‌ هه‌ڵبژاردنی 7 فیلم له‌ سینه‌مای ئێران، فه‌رهه‌نگ و بابه‌ته‌كانی كۆمه‌ڵایه‌تی ئێرانی كردۆته‌ ته‌وه‌ری خۆی. فیلمی دیكۆمێنتی "كارت قرمز" واته‌ "كارتی سوور" له‌ میانه‌ی 18مین خولی ئه‌م فیستیڤاڵه‌دا نمایش كرا.

18مین خولی فیستیڤاڵی ساڵانه‌ی فیلمه‌ ئێرانییه‌كان له‌ زانكۆی UCLAی لۆس ئه‌نجلێس رۆژی 12ی ئه‌پرێڵی 2008 رێكه‌وتی 24ی خاكه‌لێوه‌ی 1387 به‌ دانیشتنێك له‌ سه‌ر "هونه‌ری فیلمسازی له‌ ئێرانی هاوچه‌رخ"دا ده‌ستی پێكرد و تا رۆژی 27ی ئه‌پرێڵ رێكه‌وتی 8ی گوڵان درێژه‌ی ده‌بێت.
 
له‌ سێ به‌شی هه‌ڵسه‌نگاندن له‌ سه‌ر سینه‌مای ئێران و كێبڕكێی فیلمه‌ نیوه‌ بڵند و فیلمه‌ بڵنده‌كان و هه‌روه‌ها به‌شی خه‌ڵاتی بینه‌ران له‌ میانه‌ی پازده‌یه‌مین خولی فیستیڤاڵی نێونه‌ته‌وه‌یی فیلمی "هات داكیز" له‌ شاری تۆرێنتۆ له‌ وڵاتی كه‌نه‌دا بۆ هۆگرانی هونه‌ری سینه‌ما نمایش ده‌كرێت.

پازده‌یه‌مین خولی فیستیڤاڵی نێونه‌ته‌وه‌یی فیلمی "هات داكیز" له‌ رۆژانی 17 تا 27ی ئه‌پریل (29ی خاكه‌لێوه‌ تا 8ی ) به‌ به‌شداری 173 فیلم له‌ 36 وڵاتی دونیا له‌ شاری تۆرێنتۆ به‌ڕێوه‌ده‌چێت كه‌ تیایدا 44 فیلم له‌ وڵاتی ئه‌مه‌ریكا به‌شداریان كردووه‌.

له‌ میانه‌ی فیستیڤاڵی نێونه‌ته‌وه‌یی فیلمی "هات داكیز" چوار سیمینار به‌ڕێوه‌ده‌چێت كه‌ سیمینارێك تایبه‌ته‌ به‌ سینه‌مای دیكۆمێنتی ئێران كه‌ تیایدا خاتوو مه‌هناز ئه‌فزه‌لی له‌ لایه‌ن به‌رپرسانی فیستیڤاڵه‌وه‌ بانگهێشت كراوه‌ و سه‌باره‌ت به‌ فیلمی دیكۆمێنتی "كارتی سوور" و باروودۆخی ئێستای سینه‌مای دیكۆمێنتی ئێران بۆ ئاماده‌بووان دێته‌ ئاخاوتن.

فیستیڤاڵی فیلمی "هات داكیز"ی 2008 به‌ نمایش كردنی فیلمی دیكۆمێنتی "ئیرئیندیا 182" له‌ ده‌رهێنانی "ئیسترولا گۆرنارسێن" ده‌ست پێده‌كات كه‌ سه‌باره‌ت به‌ ته‌قینه‌وه‌ی ساڵی 1985 له‌ فرۆكه‌دایه‌ كه‌ تیایدا 329 كه‌س كوژران.

فیستیڤاڵی نێونه‌ته‌وه‌یی فیلمی "هات داكیز" یه‌كێكه‌ له‌ گرنگترین فیستیڤاڵه‌كانی سینه‌مای دیكۆمێنتی دنیا و هه‌روه‌ها له‌ گرنگترین رووداوه‌ی سینه‌مای دیكۆمێنتی باكووری ئه‌مه‌ریكا دێته‌ ئه‌ژماردن.

شیاوی باسكردنه‌ فیلمی دیكۆمێنتی "كارتی سوور" پێشتر له‌ چه‌ندین فیستیڤاڵی نێونه‌ته‌وه‌ییدا به‌سه‌ركه‌وتووییه‌وه‌ نمایش كراوه‌، له‌وانه‌:
ـ به‌شی كێبڕكێی 43مین خولی فیستیڤاڵی نێونه‌ته‌وه‌یی فیلمی شیكاگۆ، كه‌ له‌ رۆژانی 4 تا 17ی ئۆكتۆبری 2007 (12 تا 25ی ره‌زبه‌ری 1386) له‌ شاری شیكاگۆ له‌ وڵاتی ئه‌مه‌ریكا به‌ڕێوه‌چوو.

ـ یه‌كه‌مین خولی فیستیڤاڵی نێونه‌ته‌وه‌یی فیلمه‌ دیكۆمێنتییه‌كانی ئێران: "سینه‌ما حه‌قیقه‌ت"، كه‌ له‌ رۆژانی 15 تا 19ی ئۆكتۆبر (27 تا 23ی ره‌زبه‌ر) له‌ شاری تاران به‌ڕێوه‌چوو.

ـ له‌ به‌رنامه‌ی تایبه‌تی موزه‌خانه‌ی هونه‌ره‌ جوانه‌كانی بۆستۆن كه‌ له‌ رۆژانی 9 تا 24ی نۆڤه‌مبه‌ری 2007 (18ی خه‌زه‌لوه‌ر تا 3ی سه‌رماوه‌زی 1386) له‌ شاری بۆستن له‌ وڵاتی ئه‌مه‌ریكا به‌ڕێوه‌چوو.

 له‌ دووه‌مین خولی فیستیڤاڵی فیلمه‌كانی ئێرانی له‌ وڵاتی هه‌ڵه‌ندا له‌گه‌ڵ 36 كورته‌ فیلم و فیلمی دیكۆمێنتی و هه‌روه‌ها 7 فیلمی بڵندی سینه‌مایی له‌ وڵاتی ئێران، بۆ ماوه‌ی 3 رۆژ بۆ هۆگرانی هونه‌ری سینه‌ما نمایش كرا.

ـ له‌ فیستیڤاڵی نێونه‌ته‌وه‌یی "وه‌یناڵ" كه‌ له‌ رۆژانی 19 تا 31ی ئۆكتۆبری 2007 (27ی ره‌زبه‌ر تا 9ی خه‌زه‌لوه‌ری 1386) كه‌ له‌ شاری ڤییه‌نا له‌ وڵاتی نه‌مسا به‌ڕێوه‌چوو.

ـ له‌ فیستیڤاڵی نێونه‌ته‌وه‌یی فیلمه‌ دێكۆمێنتییه‌كانی "ئه‌فریقای باشوور"، كه‌ له‌ رۆژانی 29ی جولای تا 5ی ئۆگۆستی 2007 (29 پووشپه‌ڕ تا 14ی گه‌لاوێژی 1386) له‌ شاره‌كانی "كیپ تاون" و "ژوهانسبورگ" به‌ڕێوه‌چوو.

ـ له‌ به‌شی كێبڕكێی فیلمه‌ دیكۆمێنتییه‌ بڵنده‌كانی 19مین خولی فیستیڤاڵی نێونه‌ته‌وه‌یی فیلمی دیكۆمێنتی "ئه‌مستردام" له‌ هۆڵه‌ندا نمایش كرا، ئه‌م فیستیڤاڵه‌ گه‌وره‌ترین و پڕبایخترین فیستیڤاڵی فیلمی دیكۆمێنتی له‌ جیهاندایه‌و وه‌كوو فیستیڤاڵی "كان"ی فیلمی دیكۆمێنتی ناسراوه‌.

ـ له‌ به‌شی كێبڕكێی 22مین خولی فیستیڤاڵی نێونه‌ته‌وه‌یی فیلمه‌ دێكۆمێنتییه‌كانی "میونیخ" كه‌ له‌ رۆژانی 2 تا 10ی مای 2007 (12 تا 20ی گوڵانی) له‌ شاری مۆنیخ له‌ وڵاتی ئه‌ڵمانیا به‌ڕێوه‌چوو.

به‌ پێی راپۆرتی به‌شی هونه‌ری ئاژانسی هه‌واڵی په‌یامنێر، له‌م كۆری بیرئانینه‌دا ژماره‌یه‌ك له‌ دۆستانی وێنه‌گر له‌ گه‌ڵ بنه‌ماڵه‌ی كاوه‌ گوڵستان و هه‌روه‌ها قوتابیانی ئاماده‌بوون. ئه‌وان له‌ سه‌ره‌تای پێنجه‌مین ساڵیادی كۆچی دوایی هونه‌رمه‌ند، له‌و رۆژه‌دا له‌ سه‌ر گڵكۆكه‌ی له‌ گوندی ئه‌فجه‌ كه‌ له‌ ناوچه‌ی له‌واسانه‌ كۆ بوونه‌وه‌و یادیان به‌رز راگرت.

كاوه‌ گوڵستان ساڵی 1950 (1329) له‌ شاری ئابادان له‌ باشووری ئێران له‌ دایك بوو. كاوه‌ كوری نووسه‌ری ناوداری ئێرانی ئیبراهیم گوڵستانـه‌ و كاری وێنه‌گریی به‌ شێوه‌ی پرۆفشیۆناڵ له‌ ساڵی 1975 (1354) ده‌ستپێكرد. گوڵستان له‌ زومره‌ی ئه‌و تاكه‌ وێنه‌گرانه‌ بوو كه‌ وێنه‌ی خۆپیشاندانه‌كانی خه‌ڵكی ئێرانیان له‌ رۆژه‌كانی شۆرشی گه‌لانی ئێران بۆ رۆژنامه‌كانی بیانی ده‌نارد. پاشان خه‌ڵاتی "رابێرت كاپا"ی له‌به‌ر وێنه‌یه‌ك به‌ده‌ستهێنا كه‌ ئیمام خومه‌ینی (ره‌) له‌ كاتی هاتنه‌ خواره‌وه‌ له‌ پلیكانه‌كانی ئه‌و فرۆكه‌یه‌ نیشان ده‌دات كه‌ ئه‌وی له‌ پاریسه‌وه‌ هێنا بۆ تاران.

كاوه‌ گوڵستان له‌ سه‌ره‌تای ساڵانی 80كان به‌ كامێراكه‌ی كۆمه‌ڵێك وێنه‌ی پڕ بایه‌خی له‌ شاره‌كانی پارێزگای كوردستانی تۆمار كرد و له‌ رۆژنامه‌ گرینگه‌كانی بیانیدا بڵاوی كردنه‌وه‌ كه‌ به‌ گوێره‌ی كارناسانی فۆتۆگرافی له‌ به‌هێزترین و ناودارترین وێنه‌كانی ئه‌و سه‌رده‌مه‌ی دنیا دێنه‌ ئه‌ژماردن.

گوڵستان له‌ ساڵی 1995 (1374) هاوكاری خۆی له‌ گه‌ڵ ته‌له‌فزیۆنی BBC ده‌ستپێكرد. له‌ گه‌ڵ ده‌ستپێكی پرۆسه‌ی ئازاد كردنی عێراق، به‌ تیمێكی هه‌واڵنێرییه‌وه‌ كه‌ پێكهاتوو له‌ "جیم میۆر" په‌یامنێری BBC  له‌ ئێران، به‌رهه‌مهێنه‌ر، وه‌رگێر و رێنوێنێكی كورد، چوون بۆ هه‌رێمی كوردستانی عێراق. ئه‌و تیمه‌ به‌رده‌وام هه‌واڵه‌كانی ئه‌و رۆژانه‌ی
هه‌رێمی كوردستانیان له‌ گه‌ڵ وێنه‌كانی كاوه‌ گوڵستان له‌ كه‌ناڵی BBC بڵاو
ده‌كرده‌وه‌.

ئه‌م گروپه‌ له‌ رۆژی 13ی خاكه‌لێوه‌ی ساڵی 1382 رێكه‌وتی 2ی ئه‌پرێلی 2003 به‌ مه‌به‌ستی ئاماده‌ كردنی راپۆرتێك ده‌رباره‌ی كشانه‌وه‌ی هێزه‌ به‌عسییه‌كان له‌ پارێزگای كه‌ركووك له‌ شارۆچكه‌ی كفری له‌ هه‌رێمی كوردستان كه‌وتنه‌ سه‌ر مین. له‌وێ ئۆتۆمبێله‌كه‌یان وه‌ستا، به‌رهه‌مهێنه‌ر یه‌كه‌مین كه‌سه‌ كه‌ دێته‌ خوارێ، هه‌نگاوی یه‌كه‌می ئه‌و ته‌قینه‌وه‌یه‌كی به‌دواوه‌ ده‌بێت و لاقه‌كانی له‌ ده‌ست ده‌دات.
 
هونه‌رمه‌ندی وێنه‌گر و كامێرامان كاوه‌ گوڵستان كه‌ پێی وایه‌ خۆمپاره‌ هاویشتراوه‌، هه‌ڵدێت بۆ ئه‌وه‌ی كه‌ خۆی بشارێته‌وه‌، ئه‌ویش ده‌چێته‌ سه‌ر مین و ده‌ست به‌جێ گیانی له‌ ده‌ست ده‌دات.

له‌ یه‌كه‌مین ساڵیادی كۆچی دوایی هونه‌رمه‌ندی وێنه‌گر و كامێرامانی ناوداری ئێرانی "كاوه‌ گوڵستان" به‌ هاوكاری بنه‌ماڵه‌ و ژماره‌یه‌ك له‌ دۆستانیی، یه‌كه‌مین خه‌ڵاتی سه‌ربه‌خۆی وێنه‌گریی رۆژنامه‌نووسی به‌ ناونیشانی "جایزه‌ عكس خبری گلستان" واته‌ "خه‌ڵاتی وێنه‌ی هه‌واڵیی گوڵستان" دامه‌زرا كه‌ تا ئێستا سێ خولیی به‌ڕێوه‌چووه‌.

لة په‌یامنێرةوة

 كۆنسێرتی گروپی موزیكی كامكاران به‌ ده‌نگی هونه‌رمه‌ندی گۆرانیبێژ بیژه‌ن كامكار و به‌ سه‌رپه‌رشتی هونه‌رمه‌ند هوشه‌نگ كامكار له‌ دوو به‌شی موزیكی و گۆرانی كوردی و فارسی له‌ شاره‌كانی میونخ، فرانكفۆرت و دۆسێلدۆرف له‌ وڵاتی ئه‌ڵمانیا به‌ڕێوه‌چوو.

كۆنسێرتی یه‌كه‌می گروپی موزیكی كامكاران سه‌ره‌تا له‌ هۆڵی گه‌وره‌ی "تۆن هاڵ" له‌ شاری دۆسێلدۆرف به‌ جوانی به‌ڕێوه‌چوو. كامكاران له‌درێژه‌ی زنجیره‌ كۆنسێرته‌كه‌یاندا له‌ شاری فرانكفۆرت و هه‌روه‌ها له‌ هۆڵی "گاستیك"ی كۆلێژی موزیكی شاری میونخ، به‌ پێشكه‌ش كردنی كۆمه‌ڵێك مێلۆدی و گۆرانی كوردی كۆتاییان به‌ به‌رنامه‌كه‌یان له‌ وڵاتی ئه‌ڵمانیا هێنا.

گروپی موزیكی كامكاران له‌ 13 هونه‌رمه‌ندی به‌ ئه‌زموون و به‌توانا پێكاتووه‌ كه‌ بریتین له‌: هوشه‌نگ كامكار ـ سه‌رپه‌رشتی گروپ و ئاوازدانه‌ر، بیژه‌ن كامكار ـ گۆرانیبێژ، ئامێرژه‌نی ده‌ف و روباب، په‌شه‌نگ كامكار ـ ئامێرژه‌نی سه‌نتوور، ئه‌رسه‌لان كامكار ـ ئاوازدانه‌ و ئامێرژه‌نی عود، قه‌شه‌نگ كامكار ـ ئامێرژه‌نی سێ تار، ئه‌رژه‌نگ كامكار ـ ئامێرژه‌نی زه‌رب، ئه‌رده‌شیر كامكار ـ ئامێرژه‌نی كه‌مانچه‌، ئه‌رده‌وان كامكار ـ ئامێرژه‌نی سه‌نتوور، سه‌با كامكار ـ هاوخوان و ئامێرژه‌نی ده‌هۆڵ، ئه‌رژه‌نگ سه‌یفی زاده‌ ـ ئامێرژه‌نی تار، شه‌روین مۆهاجیر ـ ئامێرژه‌نی كه‌مانچه‌، ئه‌میر حه‌قیری ـ ئامێرژه‌نی ده‌ف و مریه‌م ئیبراهیم پوور ـ هاوخوان و ئامێرژه‌نی قه‌یچه‌ك.