هونه‌رنما

به‌ گوێره‌ی هه‌واڵی "فرانس پرێس"، (11)هه‌مین خولی كێبرِكێیه‌كانی ئۆسكاری سینه‌مای هیندستان بۆ ماوه‌ی سێ رۆژ له‌ (5-7)ی حوزه‌یران له‌ سریلانكا به‌رِێوه‌ ده‌چێت.

ئه‌و رێورِه‌سمه‌ به‌ ئاماده‌بوونی زیاتر له‌ (500) میوانی شانازی له‌و وڵاته‌ به‌رِێوه‌ ده‌چێت و به‌ شێوه‌ی راسته‌وخۆ له‌ رێگای ته‌له‌فزیون بۆ نزیكه‌ی (600) ملیۆن بینه‌ر له‌ (110) وڵاتی جیهان بڵاو ده‌كرێته‌وه‌.

له‌ به‌شداربووانی ئه‌و رێورِه‌سمه‌ ده‌توانین ئاماژه‌ به‌ "ئه‌میتاب باچان"، "ئابشیك باچان"، "ئایشواریارای"، "عامیر خان"، "ئانیل كاپور"، "كاجول"، "جوهی چاولا"، "دێرمێندرا"، "مۆهانلال"، "شارۆخ خان" و...هتد بده‌ین.

ئه‌و فیلمه‌ چیرۆكی دانیشتوانی شاری كه‌ركوك و سكاڵایان له‌ بوونی نه‌وت له‌ شاره‌كه‌یاندا ده‌خاته‌روو، چیرۆكی ژیانی و كێشه‌و گیروگرفتی خه‌ڵكی كه‌ركوكه‌.

لیژنه‌ی دادوه‌رانی به‌شی نێوه‌نه‌ته‌وه‌یی ئه‌و فیستیڤاڵه‌ له‌ 4 نیسان،  له‌ یاداشتێكدا له‌ ماڵپه‌ری فیستیڤاڵه‌وه‌ رایانگه‌یاندوه‌، ئه‌وان دوای سێ رۆژ كاری قورس و بینیی فیلمه‌كان، بڕیاریانداوه‌ ئه‌و فیلمه‌ خه‌ڵات بكه‌ن،

خه‌ڵاته‌كانی به‌شی نێونه‌ته‌وه‌یی كه‌ ته‌نها دوو خه‌ڵات دبه‌به‌خشێت، به‌م شێوه‌یه‌ بوون، خه‌ڵاتی یه‌كه‌م بۆ فیلمی "دوای هه‌موویان" له‌ ده‌رهێنانی رافائێل سار له‌ وڵاتی به‌رازیل، خه‌ڵاتی دووه‌م بۆ فیلمی "نه‌وت شێرپه‌نجه‌ی شاره‌كه‌م" له‌ ده‌رهێنانی ته‌ها كه‌ریمی.

"نه‌وت شێرپه‌نجه‌ی شاره‌كه‌م" پێشتریش به‌شداری له‌ چه‌ندین فیستیڤاڵی نێونه‌ته‌وه‌یی وه‌ك فێستیڤاڵی فیلمی دیكومێنتی "ئه‌لجه‌زیره‌" كردووه‌ و خه‌ڵاتی ته‌له‌فیزیۆنیERDELY  له‌ به‌شی دۆكیۆمێنتی ده‌یه‌مین فێستیڤاڵی  فیلمی له‌ شاری (مورش) له‌ وڵاتی رۆمانیا به‌ده‌ست هێناوه‌.
ئه‌م فیلمه‌، فیلمێكی 20  خوله‌كییه‌، له‌ كه‌ركوك و ده‌وروبه‌ری وێنه‌ی گیراوه‌، باس له‌ كێشه‌كانی بوونی نه‌وت له‌و شاره‌ ده‌كات.

نوسین و ده‌رهێنانی ئه‌و فیلمه‌ له‌ لایه‌ن ته‌ها كریمی ئه‌نجامدراوه‌ و كه‌یوان یوسفی كاری وێنه‌گرتن و هاوڕێ كه‌ریمی كار مۆنتاژی بۆ كردووه‌. 

ته‌ها كه‌ریمی ده‌رهێنه‌ری ئه‌و فیلمه‌ له‌دایك بووی ساڵی 1976ه‌ له‌شاری بانه‌ له‌رۆژهه‌ڵاتی كوردستان، سه‌ره‌تای كاری به‌ نووسینی چیرۆك ده‌ست پێده‌كات، ساڵی 2004 له‌زانكۆی هونه‌ری تاران له‌به‌شی سینه‌ما به‌كالیۆرس وه‌رده‌گرێت، تا ئێستا 4 فیلمی (سنوری ژین)، (زریان)، (سه‌مای مرواریه‌كان) و (كوێستانی سپی) ساز كردووه‌، یه‌كه‌م فیلمی سینه‌مایی دررێژی به‌ ناوی "كوێستانی قه‌ندیل" ته‌واوو بووه‌ وئاماده‌ی نمایش كردنه‌.

ناوی فیلم: نه‌‌وت شێرپه‌‌نجه‌‌ی شاره‌كه‌م
نووسین و ده‌رهێنان: ته‌‌ها كه‌‌ریمی.
وێنه‌گر: كه‌‌یوان یوسفی.
ده‌نگ هه‌ڵگر: عه‌‌لی وه‌‌فایی.
مۆنتاژ: هاوڕێ كه‌‌ریمی.
كات‌: 20 خوله‌‌ك

به‌ پێی راپۆڕتی  ئه‌نجومه‌نی ناوداری فیلمی "لینكۆن سه‌نته‌ر" له‌ شاری نیۆیۆرك چاوخشاندنێكی به‌ به‌رهه‌مه‌ سینه‌ماییه‌كانی ده‌رهێنه‌ری به‌ئه‌زموومنی كورد به‌همه‌ن قوبادی ساز كرد و رێزی تایبه‌تی له‌م هونه‌رمه‌نده‌ كورده‌ گرت. له‌م به‌رنامه‌ی رێزلێنانه‌دا كه‌ به‌ ئاماده‌بوونی به‌همه‌ن قوبادی و خاتوو رۆكسانا سابیری به‌ڕێوه‌چوو، رۆژی سێشه‌مه‌ 14ی ئه‌پریل فیلمی سینه‌مایی "كسی از گربه‌های ایرانی خبر نداره‌" واته‌ "كه‌س له‌ پشیله‌ ئێرانییه‌كان خه‌به‌ری نییه‌" له‌ شاری نیۆیۆرك له‌ وڵاتی ئه‌مه‌ریكا ده‌ستی پێكرد و له‌ درێژه‌دا فیلمه‌كانی دیكه‌ی سینه‌ماكاری ناوداری كورد نمایش كران، له‌وانه‌: "كاتێك بۆ مه‌ستی ئه‌سپه‌كان"، "گۆرانییه‌كانی وڵاتی دایكم"، "كیسه‌ڵه‌كانیش ده‌توانن بفڕن" و "نیوه‌ مانگ".

له‌ بروشووری ئه‌م به‌رنامه‌یدا هاتووه‌: "به‌همه‌ن قوبادی هه‌ر له‌ یه‌كه‌مین فیلمه‌ به‌رچاوه‌كه‌ی "كاتێك بۆ مه‌ستی ئه‌سپه‌كان"، ناوی نه‌ ته‌نیا وه‌كوو یه‌كێك له‌ سینه‌ماكاره‌ به‌هره‌مه‌نده‌كانی نه‌وه‌ی خۆی تۆمار كرد به‌ڵكوو وه‌كوو یه‌كێك له‌ به‌ وزه‌ته‌رین فیلمسازه‌كانی نه‌وه‌ی خۆی له‌ مێژوودا تۆمار كرد. له‌ فیلمه‌كانیدا به‌ به‌رده‌وامی رووبه‌ڕووری چاوه‌ڕوانییه‌ مه‌عموولییه‌كان ده‌بێته‌وه‌ و ده‌یانخاته‌ ژێر ڕكێفی خۆیه‌وه‌، كاراكتێری فیلمه‌كانی یاخین و له‌ دژی ده‌سه‌ڵاتدا ده‌وه‌ستن و له‌ كۆمه‌ڵگایه‌كدا كه‌ ده‌یانه‌وێت دایانمركێنن، كه‌شوهه‌وا بۆ خۆیان خۆش ده‌كه‌ن."

به‌رنامه‌ی چاوخشاندنی به‌رهه‌مه‌كانی به‌همه‌ن قوبادی له‌ كاتێكدا به‌ڕێوه‌ده‌چێت كه‌ كۆمپانیای بڵاوكه‌ره‌وه‌ی فیلمی IFC له‌ رۆژی 16ی ئه‌پریله‌وه‌ فیلمی سینه‌مایی "پشیله‌ ئێرانییه‌كان" له‌ سینه‌ماكانی چه‌ندین شاری ئه‌مه‌ریكا نمایش ده‌كات. هه‌ر بۆ ئه‌م مه‌به‌سته‌ ئێستاكه‌ به‌همه‌ن قوبادی بۆ نمایشی فیلمه‌ نوێیه‌كه‌ی و هه‌روه‌ها ئه‌نجامی وتووێژ له‌گه‌ڵ ده‌زگاكانی راگه‌یاندنی ئه‌مه‌ریكا له‌ شاری نیۆیۆركه‌ و له‌ رۆژانی داهاتوودا هه‌ر بۆ ئه‌م مه‌به‌سته‌ سه‌ردانی شاره‌كانی دیكه‌ی ئه‌م وڵاته‌ ده‌كات.

گروپی موزیكی "سه‌گه‌ زه‌رده‌كان" كه‌ له‌ پێنجه‌مین به‌رهه‌می سینه‌ماكاری كوردا
رۆڵیان بینیوه‌ ئێستاكه‌ بۆ پێشكه‌ش كردنی كۆنسێرت سه‌ردانی ئه‌مه‌ریكایان كردووه‌ و تا ئه‌م كاته‌ چه‌ندین كۆنسێرتی سه‌ركه‌وتوویان ساز كردووه‌ كه‌ له‌ لایه‌ن هۆگرانی موزیكی ئه‌مه‌ریكییه‌وه‌ پێشوازییه‌كی بێوێنه‌یان لێكراوه‌.

له‌ ماڵپه‌ڕی به‌راوه‌رد كردنی فیلمی Rotton Tomatoes سه‌باره‌ت به‌ فیلمی سینه‌مایی "كه‌س له‌ پشیله‌ ئێرانییه‌كان خه‌به‌ری نییه‌" 29 ڕخنه‌ نووسراوه‌ كه‌ 28 ڕخنه‌یان پۆزێتیڤ بووه‌ و ئه‌م فیلمه‌ به‌ رێژه‌ی سه‌تا 97 له‌ سه‌رووی ریزبه‌ندی فیلمه‌كانی رۆژی ئه‌مه‌ریكادا وه‌ستاوه‌.

ئه‌مه‌ له‌ كاتێكدایه‌ كه‌ هاوكات له‌گه‌ڵ نمایش كردنی فیلمی سینه‌مایی "كه‌س له‌ پشیله‌ ئێرانییه‌كان خه‌به‌ری نییه‌" له‌ ئه‌مه‌ریكا، ئه‌م فیلمه‌ له‌ سینه‌ماكانی وڵاتانی ئیسپانیا، ئیتاڵیا، هۆڵه‌ندا، سویسرا و نه‌مسا نمایش ده‌كرێت.

نوێترین به‌رهه‌می سینه‌مایی به‌همه‌ن قوبادی له‌ دوایین به‌شداری نێونه‌ته‌وه‌یی خۆیدا له‌ فیستیڤاڵی نێونه‌ته‌وه‌یی فیلمی Movies That Matter له‌ شاری لاهه‌ی هۆڵه‌ندا نمایش كرا و له‌ لایه‌ن مافی مرۆڤ، خه‌ڵاتی ته‌مه‌نێك چالاكیی سینه‌مایی به‌ ناونیشانی Lifetime Achievement پێشكه‌ش به‌ به‌همه‌ن قوبادی كرا و خه‌ڵاتی MovieSquad All Rights و هه‌روه‌ها خه‌ڵاتی بڕی پاره‌ی نه‌قدی پێبه‌خشرا.

شاخه‌وان ئیدریس به‌رِێوه‌به‌ری به‌رِێوه‌به‌رایه‌تی سینه‌مای هه‌ولێر له‌ لێدوانێكی  بؤ‌ ئاژانسی په‌یامنێر وتی "به‌رِێوه‌به‌رایه‌تی سینه‌مای هه‌ولێر به‌هاوكاری له‌گه‌ڵ به‌رِێوه‌به‌رایه‌تی گشتیی سینه‌مای وه‌زاره‌تی رۆشنبیری حكومه‌تی هه‌رێمی كوردستان، له‌ خۆ ئاماده‌كردن داین بۆ سازكردنی فیستیڤاڵی فیلمی كوردی له‌ شاری زیورخ له‌ وڵاتی سویسرا".

به‌رِێوه‌به‌ری به‌رِێوه‌به‌رایه‌تی سینه‌مای هه‌ولێر، ده‌رباره‌ی فیلمه‌ به‌شداربووه‌كانی فیستیڤاڵ وتی "ئه‌و فیلمانه‌ی به‌رهه‌می وه‌زاره‌تی رۆشنبیرین، هه‌روه‌ها ئه‌و فیلمه‌ بڵندانه‌ی كه‌ له‌ ده‌ره‌وه‌ له‌ باره‌ی كورده‌وه‌ به‌رهه‌م هاتوون یان له‌ لایه‌ن ده‌رهێنه‌ر كورده‌كانه‌وه‌ به‌رهه‌م هاتوون، ئه‌مه‌ جگه‌ له‌ چه‌ندین فیلمی دیكۆمێنتی و كورته‌ فیلم، له‌م فیستیڤاڵه‌دا به‌شدار ده‌بن".

شاخه‌وان ئیدریس ئه‌وه‌شی ئاشكرا كرد كه‌ هه‌ر له‌ میانه‌ی ئه‌م فیستیڤاڵه‌دا، خه‌ڵات به‌سه‌ر فیلمه‌ سه‌ركه‌وتووه‌كاندا دابه‌ش ده‌كرێت.

ناوبراو ئه‌وه‌شی راگه‌یاند كه‌ ئه‌م فیستیڤاڵه‌ به‌ هه‌ماهه‌نگی له‌گه‌ڵ وه‌زاره‌تی رۆشنبیری سویسرا سازده‌كرێت.

شه‌شه‌مین خولی فیستیڤاڵی فیلمی كوردی له‌نده‌ن بۆ به‌شداری كردن له‌ یه‌كه‌مین پێشبڕكێی دیزاینی پۆسته‌ر و كاتالۆگی فیستیڤاڵدا، له‌ هونه‌رمه‌ندانی گرافیست، شێوه‌كار و نیگاركێش بانگهێشتی كردووه‌ بۆ ئه‌وه‌ی له‌ یه‌كه‌مین خولی پێشبڕكێی دیزاینی پۆسته‌ردا به‌شداری بكه‌ن.

له‌م پێشبڕكێیه‌دا به‌شداری كردن بۆ هه‌مووانه‌ و براوه‌ی پێشبڕكییه‌كه‌ش، له‌ سه‌ر ئه‌رك و خه‌رجی به‌ڕێوه‌به‌رانی فیستیڤاڵ، بۆ ئاماده‌بوون له‌ شه‌شه‌مین خولی فیستیڤاڵی فیلمی كوردی له‌نده‌ن بانگهێشت ده‌كرێت.

فیستیڤاڵی فیلمی كوردی له‌نده‌ن یه‌كێكه‌ له‌ گه‌وره‌ترین فیستیڤاڵه‌كانی فیلمی كوردی له‌ سه‌رتاسه‌ری دنیا كه‌ هه‌موو ساڵێك به‌ به‌شداری فیلمه‌ كوردییه‌كان كه‌ به‌رهه‌می سینه‌ماكارانی كورد و بیانین، له‌ 4 به‌شی فیلمی بڵندی سینه‌مایی، فیلمی دیكۆمێنتی، كورته‌ فیلم و فیلمی ئه‌نیمه‌یشێن، له‌ جۆری دیكۆمێنتی و درامی به‌ ناوه‌رۆكی كوردستان و كورده‌كان، له‌ شاری له‌نده‌ن له‌ وڵاتی به‌ریتانیا به‌ڕێوه‌ده‌چێت.

به‌رپرسانی شه‌شه‌مین خولی فیستیڤاڵی فیلمی كوردی له‌نده‌ن داوا له‌ هه‌موو هونه‌رمه‌ندانی گرافیست، شێوه‌كار، نیگاركێش و هه‌روه‌ها هۆگرانی ئه‌م هونه‌ره‌ له‌ سه‌رتاسه‌ری دنیا ده‌كه‌ن بۆ به‌شداری كردن له‌ یه‌كه‌مین خولی پێشبڕكێی وێنه‌ونیگار به‌ نیازی به‌كارهێنان له‌ دیزاینی پۆسته‌ر و نامیلكه‌ی پرۆگرامدا، ئه‌و به‌رهه‌مانه‌ی وا په‌یوه‌ندیان هه‌یه‌ به‌ كولتووری كورد، سیمبۆله‌كانی نێو فه‌رهه‌نگی كوردی، سینه‌ما، یادی شه‌شه‌مین خولی فیستیڤاڵی فیلمی كوردی و هه‌روه‌ها شاری له‌نده‌ن وه‌كوو پایته‌خت و شوێنی فیستیڤاڵه‌كه‌، به‌ زووترین كات بۆ نووسینگه‌ی فیستیڤاڵ له‌ شاری له‌نده‌ن ره‌وانه‌ بكه‌ن. دوایین مۆڵه‌ت بۆ ناردنی به‌رهه‌مه‌كان رۆژی 31ی ئۆگۆستی 2009 دیاری كراوه‌.

جێی ئاماژه‌ پێدانه‌ ئه‌مه‌ یه‌كه‌مین جاره‌ كه‌ فیستیڤاڵی فیلمی كوردی له‌نده‌ن
پێشبڕكێی وێنه‌ونیگار بۆ دیزاینی پۆسته‌ر به‌ڕێوه‌ده‌بات، ئه‌م فیستیڤاڵه‌ پێشتر به‌ شێوه‌ی تایبه‌ت داوای له‌ نیگاركێشان و شێوه‌كاران ده‌كرد تاكوو ئه‌ركی دروستكردنی وێنه‌ و نیگاره‌كانی فیستیڤاڵ له‌ ئه‌ستۆ بگرن.

هونه‌رمه‌ندان و هۆگران بۆ به‌شداری كردن له‌ یه‌كه‌مین پێشبڕكێی وێنه‌ونیگاری فیستیڤاڵی فیلمی كوردی له‌نده‌ن و هه‌روه‌ها بۆ وه‌رگرتنی زانیاری زیاتر به‌ زمانه‌كانی كوردی، ئینگلیزی، فارسی و عه‌ڕه‌بی و پڕكردنه‌وه‌ی فۆرمی ناردنی به‌رهه‌مه‌كانیان، ده‌توانن سه‌ردانی ماڵپه‌ڕی تایبه‌تی فیستیڤاڵه‌كه‌ به‌ ناونیشانی www.lkff.co.uk بكه‌ن.

"ژیانمان به‌ هه‌موو تامه‌كانییه‌وه‌ خۆش بوێت" پۆسته‌رێكی دیزاینه‌ر فه‌هیمه‌ كه‌ریمییه‌ و یه‌كێكه‌ له‌ پۆسته‌ر هه‌ڵبژێردراوه‌كان بۆ ئه‌و پێشانگا نێونه‌ته‌وه‌ییه‌ كه‌ برِیاره‌ له‌ وڵاتی پیرِۆ به‌رێوه‌ بچێت و دواتر ئه‌و به‌رهه‌مان له‌ چه‌ندین وڵاتی دیكه‌ نمایش ده‌كرێن كه‌ سه‌رجه‌میان 77 پۆسته‌رن ده‌رباره‌ی نه‌خۆشی شێرپه‌نجه‌. 

كۆلێژی هونه‌ر و دیزانی زانكۆی لایۆلای بانگهێشتی هه‌موو دیزاینه‌رانی جیهان كرد بۆ به‌شداری كردن له‌ پێشانگایه‌كی نێونه‌ته‌وه‌یی به‌ ناوی "شێرپه‌نجه‌ ئومێد و ژیان".

پێشانگاكه‌ دوو ئامانجی هه‌یه‌ یه‌كه‌میان رێگه‌گرتن له‌ نه‌خۆشی شێرپه‌نجه‌ و دووه‌م گه‌رِاندنه‌وه‌ی هیوا و ئومێد بۆ ئه‌و كه‌سانه‌ی كه‌ له‌گه‌ڵ ئه‌و نه‌خۆشییه‌ مه‌ترسیداره‌دا ژیان به‌سه‌ر ده‌به‌ن.

ئه‌و كێبركێیه‌ خه‌ڵاتی نییه‌، به‌ڵكوو له‌ كۆی به‌رهه‌م نێردراوه‌كان كه‌ زۆربه‌یان له‌ وڵاتانی ئێران و چیلی، مه‌كسیك، لوبنان، كۆلۆمبیا و ئه‌فریقا و پیرۆوه‌ بوو، 77 به‌رهه‌م بۆ نمایشكردن له‌ پێشانگایه‌كی نێونه‌ته‌وه‌یدا هه‌ڵبژێردراوون كه‌ به‌رهه‌می "ژیانمان به‌ هه‌موو تامه‌كانییه‌وه‌ خۆش بوێت" یه‌كێكه‌ له‌ پۆسته‌ره‌ هه‌ڵبژێردراوه‌كان.

فه‌هیمه‌ كه‌ریمی له‌ دایكبووی شاری بانه‌ی رۆژهه‌ڵاتی كوردستانه‌، به‌كالۆریۆسی له‌ دیزان هه‌یه‌ و تا ئێستا چه‌ندین خه‌ڵاتی ناوخۆیی ئێرانی وه‌رگرتووه‌ و به‌شداری له‌ چه‌ندین پێشانگای نێوده‌وڵه‌تی كردوه‌ و زیاتر له‌ 20 به‌رهه‌می پۆسته‌ری له‌ كتێبكانی ساڵانه‌ی گرافیكی ئێران و گرافیكی خوێندكارانی ئێران چاپكراوه‌. 

موزیكزانی به‌ئه‌زموون و ناوداری كورد هۆشه‌نگ كامكار و سه‌رپه‌ڕستی هونه‌ری گروپی موزیكی كامكاران له‌ لێدوانێكی تایبه‌ت به‌ ئاژانسی هه‌واڵی په‌یامنێر، سه‌باره‌ت به‌ كه‌سایه‌تی شمشاڵژه‌نی كورد "قاڵه‌مه‌ڕه‌"، گوتی: "به‌ڕای من یه‌كێك له‌ ئه‌ستێره‌كانی فه‌رهه‌نگی موزیكی كوردی بوو،] هۆشه‌نگ كامكار لێره‌دا دڵی پڕ بووه‌ و قسه‌ی بۆ نه‌ده‌هات ...  [به‌ڕاستی ناتوانم قسه‌ بكه‌م نازانم بڵێیم چی، به‌ڵام حه‌یف بوو. نه‌ له‌ زه‌مانی پێشوودا رێزیان لێگرت و نه‌ له‌م زه‌مانه‌شدا، به‌ڵام هونه‌رمه‌ندێكی گه‌وره‌ بوو."

هه‌روه‌ها گوتی: "باروودۆخی ژیانی ئێمه‌ زۆر باش نییه‌ و هه‌موو كه‌سێك ئێمه‌ ده‌ناسێت كه‌ چۆن ژیان ده‌به‌ینه‌ سه‌ر، به‌ڵام چه‌ند ساڵ له‌مه‌و به‌ر بڕیارماندا كه‌ یارمه‌تی "قاڵه‌مه‌ڕه‌" بده‌ین و شتێكمان بۆ دیاری كرد هه‌ر چه‌نده‌ زۆر نه‌بوو، به‌ڵام به‌داخه‌وه‌ هیچ كه‌سێك یارمه‌تی نه‌ده‌دا."

سه‌رپه‌ڕستی هونه‌ری گروپی موزیكی كامكاران سه‌باره‌ت به‌ شمشاڵژه‌نی كورد، گوتی: "مرۆڤێك بوو كه‌ له‌ پای فیكر و ئه‌ندێشه‌ی خۆی ده‌ژیا مرۆڤێكی عارف بوو، من ئه‌مڕۆكه‌ به‌ هاوسه‌ركه‌مم ده‌گوت كه‌ ئێمه‌ ئه‌گه‌ر بمانه‌وێت عیرفان و عارفییه‌ت ته‌فسیر بكه‌ین به‌ ته‌واوی مانا له‌ وجوودی ئه‌و پیاوه‌دا بوو. به‌و هونه‌رییه‌وه‌ ژیانی خۆی كرد به‌ له‌به‌ر چاوگرتنی ئه‌وه‌ی كه‌ له‌ مێژووی موزیكی كوردیدا هونه‌رمه‌ندێكی گه‌وره‌ بوو، هیچ كاتێك هونه‌ره‌كه‌ی نه‌فرۆشت و له‌و فیكر و بیروباوه‌ڕه‌ی كه‌ بووی هیچ كاتێك وازی نه‌هێنا و هه‌موو كاتێك به‌دوای ئامانج  و مه‌به‌ست و موزیكی خۆیه‌وه‌ بوو. من هه‌موو كات به‌ داخم بۆی كه‌ له‌ مێژووی ژیانیدا هیچ كه‌سێك ئاوڕی لێنه‌داوه‌ كه‌ ئه‌مه‌ زۆر جێگای داخه‌."

هۆشه‌نگ كامكار سه‌باره‌ت به‌ ره‌نگدانه‌وه‌ی كاره‌كانی "قاله‌ مه‌ڕه‌" له‌ ئاواز و گۆرانی كامكاراندا، گوتی: "من چه‌ند ساڵ له‌مه‌وبه‌ر له‌ كۆنفرانسی موزیكی "سواس" له‌ له‌نده‌ن بۆ پێشكه‌ش كردنی وتارێكی زانستی له‌سه‌ر ئامێری شمشاڵ بۆ وڵاتی به‌ریتانیا بانگهێشت كرابووم، هه‌ندێك له‌ كاره‌كانی "قاله‌ مه‌ڕه‌"م به‌ شێوی ڤیدیۆ تۆمار كرد. له‌م كۆنفرانسه‌دا من سه‌باره‌ت به‌ ئامێری شمشاڵ و شێوه‌ی ژه‌نینی ئه‌م ئامێره‌ و هه‌روه‌ها مه‌قامه‌كانی ئاخاوتنم كرد و چه‌ندین دیمه‌نم له‌ وێنه‌كانی ئه‌م فیلمه‌ بۆ بینه‌ران نمایش كرد. دیاره‌ كاره‌كانی قاله‌ مه‌ڕه‌ له‌سه‌ر ئاواز و گۆرانی گروپی موزیكی كامكاراندا كاریگه‌ری هه‌یه‌. نه‌ ته‌نیا كاره‌كانی قاله‌ مه‌ڕه‌ له‌سه‌ر ئێمه‌ كاریگه‌ری ئه‌وتۆی هه‌یه‌ به‌ڵكوو به‌ گشتی ئێمه‌ له‌ موزیكی كوردی كه‌ڵك وه‌رده‌گرین."

ئاوازدانه‌ر و ئه‌ندامی گروپی موزیكی كامكاران سه‌باره‌ت به‌ كاری هونه‌ری هاوبه‌ش له‌ گه‌ڵ قاله‌مه‌ڕه‌، گوتی: "زۆر به‌ داخم كه‌ نه‌مانتوانی و رێكنه‌كه‌وت كه‌ له‌گه‌ڵ گروپی موزیكی كامكاراندا به‌ شێوه‌ی كۆنسێرت به‌رنامه‌یه‌ك پێكه‌وه‌ پێشكه‌ش بكه‌ین كه‌ ئه‌وه‌ ته‌نیا به‌ هۆی دووری رێگاوه‌ بوو، ئه‌و له‌ ئێمه‌ دوور بوو و نه‌مانتوانی ئه‌و كاره‌ به‌یه‌كه‌وه‌ بكه‌ین. به‌ڵام من له‌ كوردستانی عێراق كاك عه‌بدوڵڵا جه‌ماڵ سگرمه‌ كارێكی سه‌باره‌ت به‌ قاله‌مه‌ڕه‌ نووسی و زۆر جوان و رێكووپێك بوو، به‌ بڕوای من ئه‌وه‌ له‌ مێژوودا ماوه‌ و من لێره‌وه‌ پیرۆزبایی پێی ده‌ڵێیم كه‌ ئه‌و كاره‌ جوانه‌ی كرد به‌ بڕوای من زۆر زۆر جوان بوو، من هه‌ر كاتێك ئه‌و كلیپه‌ ده‌بینم دڵم پڕده‌بێت."

هه‌روه‌ها گوتی: "له‌ده‌ستدانی "قاله‌مه‌ڕه‌" بۆ ته‌واوی گه‌لی كورد زۆر جێی داخه‌ له‌ هه‌ر شوێنێكی دنیا بێت، یه‌كێك له‌و ئامێرژه‌نه‌ گه‌ورانه‌ بوو كه‌ به‌داخه‌وه‌ زۆر به‌داخه‌وه‌ له‌ هه‌ژاری و نه‌داریدا ژیانی به‌سه‌ر ده‌برد، میلله‌تی كورد بۆ ئه‌و كه‌سایه‌تییه‌ ده‌بێت ره‌شپۆش بێت و ماته‌مین بگرێت."

ئاوازدانه‌ی كورد سه‌باره‌ت به‌ به‌راوردكردنی ئاستی هونه‌ری و ئامێرژه‌نی قاله‌مه‌ڕه‌ له‌ گه‌ڵ هونه‌رمه‌ندانی ناوداری دنیا، گوتی: "ده‌توانم "قاله‌مه‌ڕه‌" وه‌كوو سیتارژه‌نه‌ ناودار و گه‌وره‌ی هێندستان "بیسمیلا خان" به‌راورد بكه‌م، له‌ ئێراندا ئێمه‌ ئامێرژه‌نی زۆر گه‌وره‌مان هه‌یه‌ بۆ نموونه‌ "شاهمیرزا مورادی" ئامێرژه‌نی به‌توانای لوڕستان. قاله‌مه‌ڕه‌ش له‌ ئاستێكی زۆر به‌رزدا ئامێری شمشاڵی ده‌ژه‌نی، به‌ڵام به‌و شێوه‌یه‌ی كه‌ ده‌بوایه‌ نه‌ناسرا و هه‌ر له‌ شاری بۆكاندا ماوه‌ و به‌داخه‌وه‌ كه‌سێك ده‌ستی نه‌گرت كه‌ هونه‌ره‌كه‌یان به‌ شێوه‌ی ئه‌وتۆ و پێویست له‌ ئاستی ئێران و دنیادا بناسرێت."

موزیكزانی كورد هۆشه‌نگ كامكار و سه‌رپه‌ڕستی هونه‌ری گروپی موزیكی كامكاران له‌ كۆتایی ئه‌م دیداره‌دا گوتی: "ئێمه‌ وه‌كوو گروپی موزیكی كامكاران ئه‌و توانایه‌مان نییه‌ كه‌ به‌ ته‌نیا رێوڕه‌سمێك بۆ به‌رز راگرتنی یاد و بیره‌وه‌ری ئه‌و كه‌سایه‌تییه‌ به‌ڕێوه‌به‌رین، به‌ڵام له‌ به‌رنامه‌ماندا هه‌یه‌ كه‌ كارێكی گونجاو بۆ قاڵه‌‌مه‌ڕه‌ بكه‌ین، ده‌بێت ئه‌نجوومه‌نی كورده‌كانی تاران یا هه‌ر كه‌سێكی دیكه‌ كه‌ ئه‌و ئه‌ركه‌یان له‌سه‌ر شانه‌، رێوڕه‌سمێك بخه‌نه‌ڕێ كه‌ هه‌موو كوردێك بتوانن تیایدا به‌شداری بكه‌ن و پێكه‌وه‌ یادی مامه‌ قادر به‌رز رابگرین."